朗聲四起

Yakay ku vaga ku amia kikay “luparalubane palribulane ki druma ki laumaumase amani kudra pakiaragay maduane”. Lakamani kudra pakiaragay maduane, amani lupararuralubane ki palrapalra, maadraw ku sakiaragay madu, pakiaragay kuini ki kiaparalubu maduane, ai, makirarakay madu ka paralubu.

Kunay ka Ngudradrekay mialrika malrigili turamuru maparauralubu, laikay ku vaganay ku mararamaw ku patharevane kuini ki paralubu amia, amani kikay “palraulraw” amia.

Kikay palraulraw amani kudra ki luikay ku wacekecekele lamurikay ku akiparalubane ku aungane lini tavanane, ikay umauma, lapadulru ku apakanane ki wakela palraulraw ku sakacekele lini. Lukamialrealre lakatuase kidreele ki pasiagiagisi, ki lritudrane, ki talragi si laaliali lini. lakela palraulraw liniane, si makavaale ku vai.

Kikay “papalraulraw”, kaikalrikipaulraulraw, kuini kaiwamalra ku sakipaulraulravane, “palraulraw” amia, ka wakela kakuru kudra ki pasuaadraw ku takaungane, pakay ku asaratulrepenge asiadraw, lasarapawtaleke si pacebe ku akitalekane.

Makaela ki “paualraulraw”, kikay “mualraulraw”, amani kudra lrikibaai ku vai ini, ku nimakavaalane, ku niataradramarane, kaikaavetha ku vai, ku puku ini.

Mathariringa kikay bunguka pangukay ki “palraulraw”, ku siaasualane ku laumaumase, apalraulravane ku kidredredreme lini, ku amuane ki druma paralubu ku aungane lini lukaimakatumatumane, lakatasidramane ku wakela kidreele liniane. lumuane kidreele imialrealeane, papalraulrawnay iya, latubalre “lrikibulruaku, lrikibulrunay” iya, kuini ka tuabalrenga, lakiragay madu ka kiasikawlu muakidreele.

Masiadramadrama madu, ku lritara kela lupapalraulravaku iya. makaelanga kikaynga, mainunga madu papalraulraw, tuaadrawnga ki amulraulravanga kay laumaumase. Lakakadruanga kikay papalraulraw si maparauralubu si kirararagaynga ku tapanianiakane lini.

助人為快樂之本的精神，乃是魯凱族的傳統美德和人格價值所在，也就是「犧牲享受，享受犧牲」的實踐者。互助合作才能展現螞蟻雄兵的精神，所以，擁有一種志工的情懷參加部落的工作，或家庭之間的工作，彼此互為志工，來完成許多不可能的任務。

這種傳統的精神也成為魯凱族的風範，流傳在其他族群中的美談了，Ngudradrekay luiya takitualravane！