朗聲四起

Comod sa kako tora picodadan no niyam, ira ko takara:way a ya-si^ a kilang malisida’ i karomakatan, matiya o tata’akay a sapihpih kora papah nira, feriw han no fali^ i, mananowang. Nengneng han ira ko ’odal ato ’adipangpang a maefer i fafaed nora hanahanaan. I terong no piondoan, ira ko dadahalay salangdaw sanay a semot, ira ko ’ayam mikifawo^, makako^ko^. Ora takara:way, limaay tongroh a loma’ i, o picodadan no niyam, o pinanaman niyam to romi’ami’ad.

Yo pipahanhanan a romi’ad i, maratar caay ho^ ka sadak ko cidal, to’eman ho^, ira to ko mato’asay a ina^ ato mama^ a miondo^ i kakamakatan. Ira ko miyatayatay to tireng, ira ko mipa-kon-taway. Itira cisemotay i, salipahak sa ko ina^ ato ama: a masakero^, mido^do^ to om-po^ no radiw. Ira ko lalecad sanay ko fodoy a makero^, miyatayat to tatirengan.

Yo mangata^ to kalafian, caay to ka ’eceng ko cidal, ira to ko mafekacay, ira ko mimaliay; ira ko akong ato sona, na’o:n sa a romakat i kakamakatan. Ira haca^ ko idang ako, malahakelong a talapicodadan a misalama^, minengneng to codad i sa’adifan no riwang.

Tangasa^ sato to dadaya^, ’aloman ’alo:man ko tayraay a miondo^. ’araw han i, saheto o matayalay a ina^ ato mama^, mafelec nani katayalan i, tayra a mihoka’ to faloco’, misorar to roray. Ya i fiyaway no picodadan a tamdaw, mararid a tayra a masa’opo^, matatawatawa^ masasowalsowal.

O pipalatamdawan no singsi^ to minanamay ko picodadan, o pinanaman no micodaday. I pipahanhanan sa ri, matiraay to ko nika’aloman no tamdaw a tayra, nika o mato’asay to ko tayraay. Ano awaa:wa^ ko harengheng no piasip no wawa^ to codad i, o tawa^ ato radiw ko iraay. O kaolahan no mato’asay a miondo^ ato malalicay itira. O pisoraran no ina^ ato mama^ to faloco’ ato roray itira. Maolah kako to picodadan no mako, nani tiniay kako a romahad, saka o cecace:cay no kilakilang semosemot i, ini i fongoh ako a maemin a matilid.

假日的校園，清晨天色還有些昏暗，跑道上已有爺爺奶奶們打著太極，舞著木劍拳法；草地上的婆婆媽媽們跳著土風舞；還有一群人跳著健康操。傍晚，有人跑步、打羽毛球，也有爺爺帶着小孫子散步，還有同學相約到學校玩耍，騎樓下看書。晚上運動的人變多，他們都是抽空鍛煉身體的住在附近的人。

校園是傳道、授業、解惑之地，也是學習的天地。假日的校園充滿活力，它也是爺爺奶奶們運動、聚會的地方；更是爸爸媽媽暫時放空的好地方。