朗聲四起

O Pangcah kiso hay?

Hay, o Pangcah kako.

Mafana’ kiso a misanopangcah haw?

Ma:mang ko nikafana’ no mako, o minanamay kako imatini.

Icowa^ kiso a minanam to sowal no Pangcah?

I picodadan, tomatira pasifana’ ci mama^ ato ci ina^ i takowanan i loma’. Ano cilimaw kako i, taloma’ kako i niyaro’, o fangcalay a pinanaman ako to sowal no Pangcah itira. Rahoday a nanamen ko sowal no Pangcah, maolah kako a minanam.

Itira i niyaro’ no mako, o Pangcah ko sa’alomanay, o haliradiway, o halikeroay, ato maolahay a malali’ay ko niyaro’ niyam. Anini^ masomad maso:mad ko ’orip no tamdaw, mikilim to saka’orip ko ina^ ato mama^ i to-kay, saka hakelong sato kako a miliyas to niyaro’ a tayni. O harateng no mako, hacowaay a romi’ad, o tataloma’ kako i niyaro’ ako.

Ci akong sato ako, ira i niyaro’ ciira a maro’, o kalas to no niyaro’ ciira. O matanengay ciira to ’orip no niyaro’. Mafana’ ci akong ako a pakongko^. Iti:ya mararid kako a mitengil to pipakongko^ niira i kalaeno no kilang. Mafana’ ciira to masamaamaanay a demak, mato o nanicowaay ko tamdaw, nanicowaay ko Pangcah, cima^ ko lalengawan no to’as ako. Awaay ko kafokilan niira. Maolah kako a mitengil to masamaamaanay a kongko^ ni akong. Tomatira, lokoongen ako ko kongko^ niira, ta papitengilen ako ko idang ako. O kakalimelaan a maemin ko materekay no to’as a fenek. Tereken ako a mirayray konini a kakalimelan a fenek no to’as. 

Cima^ kiso? 

Ci Marang kako, o naikalinkoay kako. O Pangcah kako, o sa’ayaway a tayni tonini a kanatal ko to’as no mako. O Tafalong han ko ngangan no niyaro’ ako. Maolah kako to niyaro’ no mako, maolah kako to finawlan no niyaro’ ako. Mahemek kako ao Pangcah.

會講阿美族語嗎？還在學。都在哪學族語？在學校、在家裡或回部落學。阿公住在部落，是見證族人過去的智者。他很會講故事，例如世界與人類的起源、我們的祖先等等。我用手機錄下每個故事，再分享給同學，我珍惜祖先所遺留下來的點滴，我要將文化資產保留下來，將它發揚光大。

我叫Marang，我來自後山的花蓮，我是原住民，我的祖先是這塊土地最早的住民。我的故鄉在太巴塱部落，我愛我的家鄉，我愛我的部落，我以身為原住民為榮。