朗聲四起

no ka vitos namen rana do teyteyka a macinanao do pivatvatekan namen am, miwalam namen so adoa ka vehan. ori nipaciheza ko jira niapoan ko a makarala do pongso. masanib ko a maciwawalam do kamanrarakeh, so nipakamizingan ko so yapyapoan no ji angai no mavakes do Jiteywan a niononongan da no paciwalaman ko a rararakeh do ili namen.

do teylaod no ili da akay am, yanan no vahay no ngalalaw a mingaran Jiteywan a likta mahataw, omaoran na do dang a tatos a teyngi am teymapipili, matataoy paa o aramey a ikakza no mamavakes a cinonen, so niyan no mavakes a amnakenakem so ka angay do Jiteywan.

o karoan no ingaran no tao Jiteywan am Jimagaod a ka no do asa ka pozo a ka no do likey a pongso a ka no do maciatovang. no rayon am ji mancian a mangay Jiteywan a manawaz, ta kaniowen no mangahahap a tao.

neyapia Jiteywan a da pangahahapan no tao do pongso. nokakoa no piya o kakawan am ji amtad o cinedkeran a mamakong a mangay Jiteywan, no mangid sira maparala so cinedkeran am, ji na tenngi o sarasaray no maciavahay no makakavang  ang. no pikaokaod a rayon am masalisalimdaw o cinedkeran Jiteywan a mitawaz so libangbang, oranan so ipivaci a makaranow a among no rayon.

o angoangononong nokakoa am, nimian so raroa ka mavakes a nimacisakey do cinedkeran no apapnan da mangay do Jiteywan a mangap so aramey a parparngen. misinaoli rana sira do avak no awa am, to mikazda a maris so nipisinaoli da mangid Jiteywan, macita da to mipahanang o awa  am, miroa sira a komaod so avang da, am makaranes do nipisinaolian da ori am miparahet o kakawan a ji da makatalilisi so nipisinaoli da paa Jiteywan ang. ori nipatolinan da sia do raroa ka mavakes ang, so nipataiden da sira Jiteywan am nimasonong sira mangid do vanoa no ili da.

apiya rana kakawan do ararow na am, manakem da rana mangay avangen o raroa ka mavang ang, kalahen da sira am aspangan da sira do azcip, am abo rana o inawan da. nimakalapo nokanang a ka kaniow da so mamavakes a mangay Jiteywan. 

暑假回到蘭嶼，聽了小蘭嶼的傳說故事。小蘭嶼其他名稱還有海中島、到不了、對岸等等等。從前，小蘭嶼島上椰子蟹及落尾麻皆長的大和品質好，故也引發部分婦女們夢想登小島。相傳曾有兩婦女隨漁團登小蘭嶼採落尾麻，返航途中突起大風浪而折返，瞬即風平浪靜。大船數度啟航折航，便有人歸咎婦女們而決定將她們先留在小蘭嶼，漁團平順返部落灘頭。當天氣好轉時，漁團再次登小島，發現她們在洞穴內已無生命跡象，從此，小蘭嶼成女性禁地。