朗聲四起

Hnglongsan ga kai’ nku’ Gipun ga Oliorang. yugun nku’ sebu’ na’ Tu’iya’ ku’ ralu’ maha’ Hnglongsan. minuwah cku’ ralu’ nku’ ragiyax. kinakian na’ itaal nku’ Matu’uwal cu’ cunga’ ru’ sinraluan naha’ cu’ ralu’ maha’ Cawasiq. umiyax cku’ ragiyax nku’ Ciyarisan ku’ qutux cu’ imuwaag ni’ Cang. payux ku’ talan naha’ ka’ swasiq ru’ asi naha’ pagluglugani kumaal maha’ Swasiq uwi la ku’ kakian naha’. yani tayhuk cku’ kaal ka’ hani la.

capaang magalaying ’i’ tayhuk cku’ Cawasiq ku’ itaal nku’ Matu’uwal. babaw niya’ la ga muwah la ku’ tinqalangan nku’ Cingciyen ka’ Itaal.’i’ naha’ ga minuwah cku’ Sincu Ubung siyang. yani ku’ qutux cu’ imuwaag ni’ Cang. mapusugagay la cku’ innuwahan naha’ ka’ qutux cu’ imuwaag ku’ Cang. matagmakilux ru’ umiyax cku’ Mumusinmayansan ru’ tayhuk cku’ ragiyax nku’ Ciyalisan. yani tumimu cku’ Nancwang siyang la. magalpu cu’ kabhul ru’ mamaqisu cu’ kabhul ru’ maspatul cu’ mamatuu’ la ga, mana’aring cku’ ragiyax nku’ Ciyalisan ru’ makasawbih cku’ Nancwang ru’ tumuwang cku’ kakian ka’ sawni la. babaw niya’ la ga mana’aring ’i’ tumuwang ku’ qutux cu’ imuwaag ni’ Lin ru’ Cen. tiku qutux cu’ imuwaag ni’ Lin ga minukahul cku’ Sincu Skaru’ ru’ gumlug cku’ ragiyax nku’ Censan, Ciyarensan ru’ tayhuk cku’ Babuan cu’ Para’. babaw niya’ la ga, gumlug cku’ ragiyax na’ Pekengsan ru’ tayhuk cku’ Nancwang la ga tumimu cku’ tinqalangan nku’ Bungme la. babaw na’ kaal la ga, umiyax cku’ ragiyax na’ Ciyalisan ru’ tumuwang la cku’ Cinsuweicun ru’ tumimu cku’ tinqalangan nku’ Cinbulan. yani ku’ kinakian ni’ Lin ka’ qutux cu’ imuwaag. ini ka’ingasug ru’ mataga’ubaqan na’ wagi’ la ga tayhuk cku’ Mabawkian. ini ka’ingsug ru’ mabuwinah lawwi cku’ Cinbulan. maglug kinku’ qutux cu’ imuwaag ni’ Cang. yani ku’ san naha’ maha’ tinqalangan nku’ Cwasiq.

yani na’ tuminuwang cku’ luliyung na’ Mayri’ ku’ qutux cu’ imuwaag ni’ Cang, Lin ru’ Cen ga, rarimarima’ tayhuk la ku’ Mayrinax. tiku pintuwawan naha’ ga yani ku’ miniq nku’ Matu’uwal. ani ini packa ku’ kai’ na’ tinqalangan nku’ Cawasiq ru’ Tabilas. ani ini packa’ ku’ innuwahan naha’ uwi. asikina ga maglug ku’ mamaliku ru’ kakanayril ru’ ara’ruwa’ ’i’ masibalaiq naha’ la. kahi mati kumaal ku’ nanabakis na’ tinqalangan nku’ Cawasiq maha, ulung balaiq ’i’ makaal ru’ miq cu’ rawrawq ku’ Matu’uwal. balaiq cubalay ku’ inlungan nku’ Matu’uwal. yani makiya’ ku’ kinakian niyam ka’ hani la.