朗聲四起

Kanakanavu cecenana tia matacuvungu kaisisi “Mikongu”. vanai sii ’una kari miana, sua vina’ʉ ia, nivua kani “Tapucarake”. meesua patuturu Kanakanavu mataa Tapucarake. noo ’una cu vo’orua vina’ʉ ia, tia maripipiningi kungangaan ’inia. nakai niarasurumu Tapucarake ara’akia. ’akia cau tavara’ʉ ’acuu nanu nguani? ka’anʉ roimi Kanakanavu nimovua nguani rapʉ vina’ʉ. pasiʉn cu, sua nguani ia “tamu vina’ʉ” kisʉʉn. cecenana ’apaica kari meesua, maripipiningi vo’orua vina’ʉ. nakai miaa koo pa matarava Mikongu ia, ’una pa cucumeni vanai vina’ʉ sikaisisi. sikara in sua kanganiʉn ia “Karianasau”.

Kanakanavu tamna sikaisisi. ’itumuru tia ’utumʉkʉnʉ kaisisi. nakai sua kaisisi Karianasau ia, tia cani pininga kaisisi. noo cumacʉ’ʉra ’una ucani ’ʉnai, tia mamanʉng ka’umo’uma. cani pininga sarunai ia, tia mara capuku cumacʉkʉcʉkʉ ’inia. sua iisua cucuru kanganiʉn cukanang. ’esi tumatuturu, sua ’ʉnai isi ia, ’una cu cau tia ’urupaca ’inia. cau cucumeni, cumacʉ’ʉra capuku cukanang iisua. tia cu marakiu tikirimi cucumeni ’ʉnai. isi sua miana tamna niurina horecu.

akini taniara, noo pusu’ʉcʉpʉ mamanʉng. kavangvang cani pininga, tia cu mavici makai numanʉ, kakaamarʉ, tuku, tarimu. tia pa mavici cucumeni umʉkʉa, makai tanʉkʉ, tammi, ’aricang. sua isi ia, tia umʉkʉn na ’umo’uma vina’ʉ ciciri. taniara soni puisia karapa’ici, tasini mataa vutuukuru ’arasakai. aka kavangvang masitatia pokari, arakuracʉ na mamanu. noo tia cu matiananai putukio, mastaan puisia ’umu’ututu, ma’asʉngʉ. tia miakaka kani natia putukioa cani taniara.

每年會舉辦米貢祭。米貢祭之前，還有與小米生長相關的儀式，最重要的就是Karianasau。通常在新年第一個月快結束時，要留意夢境，有好夢就進行開墾的開工儀式。凌晨由家長帶領全家到預定地，首先清理邊邊的一塊土地，在田地的周邊繼續插上打結的芒草，同時要進行katatamu滴酒祈福儀式。當日午餐刻意不吃完，剩下的要包起來懸掛於工寮主柱上，象徵食物豐富有餘。 

翌日全家帶著農具跟小米以外的副食農作，這天禁酒、吃辣及魚蝦。