朗聲四起

pqasun mu calay piyux inyugan na kayal, betunx ktalan ru mtasiq qabax k’man ki khoniq ryax na tmangux abax qani, mtasiq k’man ru baqun tsasaw iyik khoniq ga ryax na ’bagan, mkbway bway ga ryax na hoqan abax, ru kmat tltu ghiyaq ga ryax na qmisan.

Ryax tmangux abax ga yani hayi mtalah tyaba na wagi, skahul mu so’un kinkilux na inlungan muwah miq klhol na rhiyan qani. Kkneril msqun mahoq llukus, kahul pinscyax mu wayan mkiyay la, Pinmuya na laqi qa ghap ga wayan mu pscyagan kilux, kahul tangux na ghap biqan mu klhol, ana qinyatan na yaki yutas ga prwangan mu pinscyax mu, nyan memaw lokah stopaw mcisan kinyatan naha, ana cquliq ga nyan memaw mqas.

Ryax ’bagan wan cu sgiwan qutux mtasaw na gong, betunx ru blaq ktalan qulih nyan memaw pyax pyax cmyax ktalan qulih. Syax gong ga mtasiq khoniq nya, baqun musa tsasaw maki kya, ccquliq qani skahul naha qsya mu mwah mahoq llukus, kruma ga spqsya naha phpah, ru mlngyaq cisan qsya, mqas ktalan rqenas naha ktalan, baha hmcwa kahul kingan qabax pintiyaw qani.

uyi ga mqas cu uyi, ana ga pisan hayi wan mgiyaw nanu, han baqun mu la, phpah, garin kya kbalay cu qutux ssalan mangay ta phpah ki kkhoniq. Cka na salan mangay phpah qani, piyux mllamu phpah ki k’man, giway mstun na khoniq, piyux qbhniq kuy ki qulih memaw betunux ktalan mcisan kya, pqasun calay ryax na hoqan abax.

Smoya cu pingayan payat ryax kayal, baha hmcwa qutux qutux pingayan ryax kayal ga ini ptnaq qabax pinyugan nya, maki mhoq abax ru maki hlaqi hlahuy ru tmangux abax ru mkiyay kayan ki mhehuy kayan, ini ptnaq qabaax kinbetunux nha ki kinbleqan nya.

喜愛四季的變化：春夏秋冬各有特色。春天溫暖的太陽，照亮大地，曬乾衣物，溫暖花種，讓人愉悅。夏天清涼的小溪，魚兒在水中嬉戲，樹木茂盛，人們用溪水洗衣、澆花與游泳，充滿活力。秋天五穀豐收，為季節增添色彩，建起花園，讓多彩花草陪伴這舒適的季節。冬天寒冷，大家穿得厚重，而作者化身白雪，為孩子們送上雪花禮物，帶來歡笑。四季交替展現自然的節奏，各具風采，以不同的色彩與生命力點綴世界，令人驚喜與喜愛。