朗聲四起

Oya romi’ad to herek no lahok, saaraaw sa kako a ca:cay a maro’ i ka’ayaw no sapad, awaay ko falocoloco’ a minengneng to codad; pasapapotal sa kako a minengneng, marasmasan ko romi’ad, nika malikat ko kakarayan, caay ka halafin, o mamasalaw to. Maolah kako to matiniay a romi’ad, narikoran no ’orad i, awaay ko tahefod, satamelac sa ko papapapah no kilakilan ato semosemot, matiya o nisawsawan, feriw sa no fali^ i, sasaepi’ sa, masorar ko roray no faloco’.

Miharateng kako, ma’orip ko tamdaw to matiniay malalifetay a sya-kay, matalaw a madipa’ no tao, orasaka rarimowak sa a mikilim to sakanarikay a ciepoc no nitayalan, orasaka awaay ko pasa^sa’ no aniniay a tamdaw. Kako sato to no mako, masamalecaday to pinangan no aniniay a tamdaw. Lowad to dafak, herek a malalo’op, macaroh a talapicodadan, macaco^co^ i loloma’ no paliding, matalaw a maapac. o mamatiniti:ni aca^ ko ’orip no tamdaw. O sowal no tamdaw, o sakacakat no ’orip no tamdaw koya “ narikayay ” a pinangan saan; nika o harateng ako, oya “ mana’onay ” hananay i, away ko epoepoc hakiya? O manina’ay no mako i, caay ka matira. O miefaway patirengay to loma’, mangalay ko matayalay a narikay, sakacietan sa ko harateng, nika ’aloman ko mapatayay to nikapiloh no nipatirengan a loma’, nawhani caay ho^ ka’icang ko amoto^ i, nipatongroh to caira. Onini i, o nikacaay ka sinanot no harateng, macaroh ko faloco’, ma’anof ko faloco’, orasaka pakalitemoh to matiniay a kakalingsesan a demak.