朗聲四起

Tona miliyas ci ina^ aci mama^ to niyaro’ a tayra i to-kay a matayal, caacaay ho^ pihapinang a misa’osi^ to romi’ad, ’araw han i, mata’elifay to ko pangkiw no mihecaan. Yo midakaw cangra to cinamalay, mi’ocil ko faloco’, nika caay pa’araw kako to losa’ i ka’ayaw nangra. Nika minokay sato kako i loma’, yo masaca:cay kako i loma’ i, serrrrrr… sa ko losa’ ako, caay pakaliyas kako to ina^ ato mama^; imatini, mangalay kako a paefer to codad a paratoh to ’ilol no faloco’.

 Malayap ako ko nipataloma’an ni ina^ aci mama^ to fa^lohay a fodoy ako ato tikami^, sowal sa i takowanan, “ Pitengil to sowal ni akong aci ama:, kalalok a micodad, kahalikaen, adihayen kacifodoy ano sienaw ko romi’ad.” saan. Pacofelis han ako a paefer ko codad i cangra, “ Aka ka adihay ko faloco’ namo, laloken ako a micodad, nika ma’ilol kako i tamowanan. Kamo sato to no namo, ’imeren to ko tireng, ano cilimaw, ka pinokay to a miliso’ i tamiyanan.” han ako.

I ’ayaw no pinapina^ a romi’ad, lipa:hak sa kako, ira ko nipaeferan ni kaka^ i takowanan to no kongkoay a codad tolo^, tada mao:lah kako toya codad. Saka saromi’ami’ad han ako a miasip, malo idang ako to romi’ad to dadaya^. Patikami^ han ako ci kaka^, tada mao:lah kako toya nipafelian iso a codad. Sowal sa kiso, “ano micoyap kako i, malasingsi^ kako.” saan. Tada mahe:mek kako. O mamisa’icel kako a micodad, nanay pakado^do^ kako to fana’ no miso a malasingsi^ ano’a:yaw.

Itiya:ay ho^, caay ho^ ka caloway ko tamdamdaw a talacowaco:wa^. Ano mangalay a milicay to i raayay a laloma’an, masasipaini to ’ilol no faloco’ i, edenang o yofing ko pakakafitay tonini, tada o kakahemekan ko tayal no malayofingay. Ano o laloodan to, kasienawan to i, caay ka talaw to sienaw, pa’ing’ing sa to cidal, awaay ko nikapidah no faloco’ to masamaamaanay a romi’ad, mireko^ to tayal a patangasa^ to codad i pilomaloma’. Tada miaray ko faloco’ ako to malayofingay, mipatangasa^ to ’ilol o faloco’ no mako i ci inaan aci mamaan.

我想念在台北工作的爸媽，每當夜深人靜，我的淚水就不知不覺的流下來，我想念他們。收到爸媽寄給我的新衣服和一封信，叮嚀要聽爺爺奶奶的話，天冷要多添加衣物。我回信告訴他們，我很想念他們，請他們放心。前些日子收到台北表哥寄給我三本書，我回信告訴他，我很喜歡他送的書。

我感謝郵差每天替人們送信到每戶人家，讓我們得以透過書信表達感情，功不可沒，郵差送達的是我對遠方親人濃濃的思念。