朗聲四起
Sacecay sa kako a maro misi’ayaw to eto i herek no lahok, pasisasinga ran han minengneng ko papotal, tarepes a macidal ko romi’ad, kafana’an co wa ko hahalafin kona hatiniay a ’orad. Tada maolah kako to hatiniay a romi ’ad, nawhan, herek to nama’orad i, siemel ko fali, feriw han no fali ko laway sanga’ay sa ko harateng, awaay ko kihar a mihafhaf tona kasiemel no fali, padeng han ko wikidan a misarocod mira’oy tona awaay ko rarawraw a matengil.
O ’orip no aniniay a siyakay, a’ide’ides sa to tayal to sakacaaw ka waha kelid nona siyakay. O tamdaw maemin, saheto o caloh ko hananay a milaheci to polong no kalotayal, ano kako to hatiraay to, pacerem mi kalic to sitosiya tayra kongkoan, miki’ayaw to kadadicodico no ’alomanay i sitosiya, sapicedengan to ’awas a pahanhan, matalaw matakop no kaikoray a tamdaw. Kaki’aya’ayaw sa a malalepelepel ko ’awas to romi’ami’ad, mahe cad o paperok no makeroay ko kalalepelepel no ’awas to romi’ami’ad, da’at sato kako, awaay to ko pihodiyakan a pasasela’ tona kalalepelepel no ’awas to romi’ami’ad, tada karorayan.
O nian sa o macedengay i, awaay ko mira a kanga’ayan saw? O tatararikorikor aca komira han? Cowa ka hatira, tengilen no mita ko paratohay i tilifi, sowal sa tonian a mapingkohay a masatongerohay loma’, oni faelohay mipatirengan loma’, cowaho ka ’alafin namipatireng, mapingkoh to sako sowal no paratohay i tilifi, onian halikiay mapeleng a mipatirengan to masatongerohay loma’ i, saheto o mi calohan a misakaliki ko pipatireng saan. Hacowaay ko laloma’an to mahadefekay a mapatay tonian a misakalikian ko tayal saw? Cowa ka piharateng to ’orip no tamdaw, deng o caloh to sakanarikayaw a malaheci ko hananay a misakaliki to tayal, awaay ko pina’on a matayal.
Oni o macedengay ko tayal i, cowa ko nika toka a mi’ida pakonahira to tayal. O macedengay i, o misarocoday mina’onay a misongila’ to tayal. Ano awaay ko mina’onay a faloco’ i, cowa ko mamatinako ira ko mihadidiay ato so’elinay a olah, cowa ko mamafana’ to masasiolaolahay a faloco’.
反思了現代社會中追求快速與效率的生活方式，提出了「慢」的重要性。隨著社會競爭激烈，許多人都在追求速度，為了不被淘汰而過度加快步伐，感到身心疲憊。進一步探討了「快」的問題，舉例指出許多工安事故都是因為貪圖快速完成工作而造成的，這些問題都與急迫有關，提醒大家在處理關鍵事務時應謹慎。最後，強調「慢」並非消極或懈怠，而是追求穩定和堅持的力量，缺少「慢」的人無法體會耐心、包容和寬恕的重要性。