朗聲四起

Manengneng ko kaemangay masacefacefang makerih a malingad tayra i roma a niyaro’ a misalama i, ma’inal aca masapa aca, ira ko ma:mang a kesem i faloco’. Maharateng iti:yaho, mitiliday ho kako i kocong sakatolo ko kongkoan no mako, saikoray to pitilid ako i kocong itiya, ma:lalokay a si’icelay kako a mitilid, ano miseking i, idahiay kako matama to ako ko pahofi no singsi, saka maolahay kako to singsi niyam, tadadimokos ko singsi niyam i takowanan.

Paka’ayaw no laheci a mitilid i kocong, mamiliwko kami mapolong tayra i Taypak misalama, tadakaolahan no mitiliday ko niya demak. “ Aciyah! Ka’inalan kamo saw, haco:wa tayra miliwko misalama ko mako hani? ” sa ko wina pasowal. “ Nga’ayay mikihatiya kako miliwko ha ina? Tatayra maemin ko singsi ato cefang niyam yo! ” han ako milicay ko wina, kaorira, halafin sa ko pitala ako awa ko cako niina.

Haharateng sa ko faloco’ ako toniya sapisalamaaw a demak, cecay to a lipay i awa ho ko sowal no wina, rawod sa to ko saikoray a pipanganganan a romi’ad, “ manikaw ko loma’ samaamaanen i, awa ko sapa’aca to sapiliwkoaw iso. ” sa to ko pacaof no wina. “ Cecayay kako ko caka pikihatiya a miliwko misalama ina, saheto tayraay a maemin ko cefang ako, mana pakacecay han kako. ” Lekal han ko wina a milaliw a pata’angay to tangic.

Anini ta’angay to kako, maharateng ko itiyaay a piliwko no mitiliday a demak, tahalosa’ ko faloco’ a mararom to kanikaw no loma’, ai:yay ko itiyaay a ’orip.

O ’icel no wina ato wama ko sakaira a mapatireng ko loma’, o sakalatamdaw no niyam a malikaka tatolo, tadalimela ko wina ato wama i tamiyanan, limela a midipot kami to malitengay niyam tahada’oc.

遇到學生旅行的羨慕與淡淡的憂傷。回憶起自己國中三年級時，作者努力學習，成績優異，受到師長的喜愛。在畢業旅行前，懇求母親讓自己參加，但最終未能如願，得知無法參加時感到非常傷心。儘管如此，並沒有責怪父母，因為理解他們當時的生活困難。父母辛苦養活家庭，展現了對子女的愛，也因此更加珍惜和照顧自己的父母。