朗聲四起

Ya romi’ad, mitaelif koya tafalahan a paliding, matengil ko yiw! yiw sanay a ngiha, aya o ma’irangay a waco, misamsaman no wawa a waco, milalingay to adada no oo’ nira, sini’ada ko faloco’ panokayen ako tayra i loma’, panganganen ako kora waco ciHappy.

Talacowa ko rakat ako talacowaay ciHappy, malacafay kami tayra omah mitoor to wina ato wama a maomah, tayra mi’adop i tokos, mikapkap to foting ato ’afar i ’alo…, talacowacowa kako i, mitooray to ciHappy, malecad o adingo ako ko mira, ano mafotifoti’ i malacafayay to kami, hato o salikaka no mako.

I sakaenem no kongkoan ako a mitilid i kosiyaw, sakapito folad no laloodan, tadafaedetay ko romi’ad itiya, malatahidahidang kami kaemangay a midangoy tayra i riyal, i lawac no riyal ciHappy a misalama, sa no fotifotingay kami a micelem midangoy, aciya ko menac niyam…, “ Pa’orip! pa’orip! pa’oripen kako! ” sako matengilay a ngiha, nengneng han i ra:ay no riyal, ma’alolay mama’emek ciDiway, sahacikay sa kako midangoy miraod ciDiwayan, kaorira, cakafilo ako pa’icel tamiyanan, matengteng niDiway kako talaeno sa no riyal ma’emek kami tatosa, aya o patay to koni sako ’angi i harateng, “ Aw! aw! aw! ” sa matengil ko ngiha niHappy ira:ay, ’aloman to ko malitengay a pa’orip tamiyanan, sanga’ay sa ko faloco’ mapa’orip to kami tatosa, hatini sanay ko kalaolaolah niyam a malawidawidang.

Tadao:lah no paro no loma’ niyam ciHappy, mangalef ko wina ako, pakaenen nira to ’okak ato titi, sano tamdaw han nira a midipot, mararid awa kami i loma’ mitilid, mimatayal i, ciHappy ko cafay no wina, ano ira ko kahemekan kalipahakan anca o karorayan no faloco’ no mira i, pasadak han nira a pasowal ciHappy, hato ma:fana’ay mitengil ciHappy, pamecek sa ko mata niHappy a minengneng, sa’iwa’iwa’iw sa to wikor a pacako, o kafokifokil aca nira a caciyaw.

O paro to no loma’ niyam ciHappy, anini cato katalekaw ciHappy, malitengay to , o kami to ko midipot to miraan, o paro no loma’ niyam ciHappy, o tahadaoc ko pidipot to kalaolah niyam.

有一天，聽到小狗的哀嚎而將牠帶回家，從此我與狗形影不離，一起生活、工作和玩耍。某個炎熱的夏天，與朋友們在海邊游泳時發生危險，Happy的叫聲吸引了大人們的救援，我更加依賴和珍惜這隻狗。Happy被家人視為一員，尤其是媽媽，常常陪伴著她，聆聽她的心情。隨著時間的推移，Happy逐漸變老，但我和家人仍決心愛護和照顧牠，承諾會一直陪伴牠，直到永遠。人與動物之間的深厚情感和無條件的愛。