朗聲四起

Kanakanavu tamna tanasʉn “Namasia” kisʉʉn. sua nganai isi ia, niaranai na cenana miana miana pa, cau Kanakanavu matanganai na cakʉran nesi. neni vanai Namasia kisʉʉn? sua Kanakanavu tamna niurina ’ʉna, ’una urucin poisua ’inia. soni parʉ’ʉna kita poisua sikara in ucani ’ʉna.

niaranai na mamarang ’ʉna makasi, ’una kani tacini nanmarua sarunai Masia kisʉʉn. matatʉa ’esi na timcara cimʉrʉ, aracan na saringusu cakʉran putukio. surumu cumacʉ’ʉra ’una ucani tatia vʉrʉnga, kurisivatʉ na cakʉran. tumʉpʉ cakʉran, ka’anʉ cu canumu tʉni muca. kuratumuru cu canumu cakʉran, tia cu miciri na pipiningi. cucuru ’apitarʉ Kanakanavu tamna tanasʉn! manasʉ tia punarʉn canumu. ’esi na caruru cimʉrʉ sua nanmarua Masia isua. vanai tia pui’i tanasʉn tumatuturu caukia, ka’anʉ tarasangai arapana’ʉ, matakurikuri, murakʉrakʉ, vakʉrʉ cu kavangvang nguain tamna tina’an. mesua nimupacai curu, mataa ’itumuru curu vakʉrʉ. koo miaranau niaraka mamacai aratʉkʉnʉ mamane. nakai mesua tanasʉn Kanakanavu, vanai sii ’una nanmarua Masia makasua tumatuturu, mata’uru cu takutavarʉ’ʉ ’una ’apitarʉ, mucanʉ aravari na ngʉngʉcara cimʉrʉ.   

makasi sua niurina ’ʉna, macuvungu niara’isi kani vavuru sua vʉrʉnga isua. natia miciri canumu tʉni cu muca. para’akia cu tanasʉn tamna ’apitarʉ. cau Kanakanavu mesua, vanai tia musu’ʉvʉ nanmarua isua. aranai mesua, cakʉran nesi ’urupaca nguain tamna nganai “Namasia” kisʉʉn. nguain tamna nganai ia Masia, pasacarapʉn “Na-”. kari isi. sua isi ia Kanakanavu tamna sipatanganai, sii tia putucau ’inia.

miana sua tanasʉn mita ia “Sanminsiang 三民鄉” kisʉʉn. kasian cau, maraa mamumʉkʉ tumatimana nganai isi. ’esi na Minkuo masiʉn pitu cenana, pati’ʉnʉ’ʉnʉʉn Namasia kisʉʉn, matarava masini. mesua cuʉn(村) tamna nganai ia, ’una Mincu(民族), Mincien(民權), Minsʉng(民生). nakai sua nganai isi ia, ’akia vanai mataa ka’ʉnai tamna rikisi. makarikari cau, tia manʉng ’apui’iʉn miana tamna nganai. nguai sua Kanakanavu tamna niurina nganai: Nangisaru, Mangacun, Tanganua. Nakasayana tamna nganai ia: 南沙魯, 瑪雅, 達卡努瓦. uturu ri(里). nganai isi, ’una kavangvang rikisi ’imi. cucuru! tia kita masakʉn ’inia.

卡那卡那富族的部落稱為Namasia，是源自數百年前，卡那卡那富族人為此地的溪流所命名而來的。傳說一位叫Masia的男子，在溪流水源山頭工作，看到一條巨大的鱸鰻堵住了溪水不能流動。溪水快要滿出來，部落岌岌可危！青年從山頂上，又滾又爬傷痕累累的奔回部落通報族人，逃離危機。為了紀念那位青年，就以其名稱呼此溪流為「Namasia」。之前曾經被稱為「三民鄉」，有民族、民權、民生三個村。現在已更名為那瑪夏。有南沙魯、瑪雅、達卡努瓦三個里。