朗聲四起

kinadaman kana wari mu, ulra a sinbung mararengay za ulra sasa kumuing a vavayan, marama’iza’izang kantaw i savak, zi intaw sasa na mitrepa peniya kanan kiyakarunan tu ailranan kanantu maza’izangan i ruma’, kana sawariyan lra kuwaleng i temamataw zi maw intaw na mareanger i savak, maw lra tu vangavangan zatu kiyakarunan zi mavangavang milran kani temamataw a pida lra ’ami tu kuwalengan.

ma’izang lra tu ’ami zi ’azi ziya mituruma’an ini na mailran i ruma’ na vulavulayan mu, maw na kemazu yawlra zi, marekakuwatreng lra tu zazek, ’azi lra kirungetr, ’azi lra kiseker kantu ulepan milran kani temamataw, zi mapalak lra yawlra, piya venavalray kanantu pakazalram zatu kinapalakan zi nantu ivavilin na pinizuwa, zi kurtilu’ lra i ruma’, mukuwa lra mena’uwa i tainataw mu, madakedak lra zi ma’ulid zi mavangavangan za tuy kakudayaw, sazu tu anger zi pakirev trematrangis, “inakuwaya ku alrak!” kema, zi ngarayaw ku kema yawlra zi, kurelrang kurtilu’ kema lra tu ’udar na lralrak. padingwa lra kana kinsas, medek lra na kinsas mu, remeput lra tu yaangaz, kema na sinbung, nu mena’u ta kana kemani na kasu’ele’elem mu, ma’uliz ta kemudaya ta marengay zata anger.

kanta i Taiwan harem markazuwan lra na dawdawan mu, kinakuwakuwa lra kana kanatal ziya kema, aziyu ziya uniyan ziya na ciēnpaw mu, na kalramalraman ziya na trau mu, uniyan za paisu kipuwatremel zatu kuwalengan zi, na ma’izang lra tu ’ami na dawdawan mu, kipakalrawalrawa lra. tu ka’inavayan nu aidan. maw izu na kaytayan na dawdawan aziyu ziya.

inta na trau ziya, i eman na ’azi kuwaaleng? i eman na ’azi miyanatray? ini na ailranan kana ma’izangan mu, i eman na ’azi mazalram za maw inta na mutualrak ziya na mitrepa mena’u milran, maw mu, nu ’azi lra pakakuwa pulivun zi uniyan lra za paisu tu putratremel zi markakuwatreng lra tu zazek na alrak mu, kakudayaw lra munayun milran kana dawdawan?

palru harem kanta i Taiwan, uniyan ziya za penauwa mitrepa kana pulraalrangan milran kana dawdawan, zi na pulalivun, zi mailran ziya kanantu trau na kuwaaleng i ruma’. nani na trau uniyan lra tu talralimayan yawlra, zi maw na makalrang lra kana pamelri na dadalan. nu karuwa ta talrima zata sēhu i rakaz mu, kapaaruwaruwa ziya na kuwaazu!

一則報導指出有位公務員是家中長女，因長期照顧重病臥床的老父和年邁母親，中年仍未婚，在工作與家庭責任壓力過大輕生，而母親在悲痛之下也跟著女兒輕生。

臺灣老化的速度是全球之冠，兒女要為生計苦惱；又要擔心年邁多病的父母。目前並無完善的公辦長照保險，很多人沒有足夠的醫護專業與時間，面對長照患者時，都會陷入困境！政府應積極設立專案，讓有需要的民眾可隨時申請，減輕民眾的負擔，也能減少因長照問題衍生出的人倫悲劇！