朗聲四起

Heza naak a masituqas a ispasepuk nastama ki duma tu bunun, al langat al ni-i tu takitangqedip ta tu bunun a siza sepuk, ni-i saak maqansiap tu atikis ang saak, mintalmenduu in saak a, issiza in saak nai tun i binano-az, hezin naak a uvaz-az tu tatau, tatini ka binano-az a, dadusa ka bananaz, siza-un in bunun a binano-az.

Heza tu sanavan, saduu amin saam i sanqaqaningu-an, madengaz in naak a tamatina, mazima ka tama kun tataqu pali-u-uni qabasan tu miminopa nenka, miniqdi tu lopa ang mapasiza ki tina tun, uka sui, lusqa kopaqani-an mama-un i hutan, ma-aq is na asa ma-un i maduq a, na asa ang tu mabazu, tala qo ni-i tu sia tina naak a mabazu tilas, uu ka na tudiip maqtu ukonan i maduq, sia naak kastanun mazima ma-un i duqtas, tal-asaz in taltas-a ka konun, na minkaku-aq i maqanglas qo ki.

Minheza tudiip a masusuazlukis haan ludundengaz siin mavavalval tu iskuzakuza, malavi saak mun-ita kasui, telpitu saak dikut ita masusuaz nait mavavalval ta ka, sevan saak i sui, mudaan ita munlumaq ti, tuza tu hezin tu tikis a sui, iskodun zami mabaliv i tilaspaaz ma-un, isbaliv a duma sui ki qemqemangsut haan lumaq, minopa ta naam qabas a sin-iqumis.

Tisqa ka tama tupa tu, “Na taqu-ak asu tu, na ni-i qo hineza su-u ka bananaz tu masinoba, tis-uni tu maqanglasdengaz tudiip tu tos-uvaz-azun nepa ka, ispasepuk zaku ki pantes-anun naak haan tanqedip ta, tupa-un a ngaan tu Qesul, solopa ko saak masalpu ang istaa, ma-aq is san heza in tu tikis a sui ka, sohanang ta kilim istaa.”

Katinitini saak miliskin tu al maku-aq dau al ilumaq ti naak a masinoba ka. Paaq pu-un ma-aq tu uka in naak a tamatina ka, tupa-uk naak a binano-az tu na munhaan ata tanqedip ta kilim i masinoba Qesul naak, tuza tu mun-ita saam kilim a, sepsepukun i diqanin i mahepi saam kedu-anan, maqansiap in tu sia ka Qesul a, patalikaput saam, madengaz in pu-un tu tuza tu unin ang i maqtu ang mapasaduu. Na patinpalavaaz in saam i na munsuqis in saam a, tangis saam amin, mopa daqvisan qan a ka, ni-i tu nepun tu na laku-aq muqna mapasaduu, tupa-uk tu palsisihalav a lutbu, na pasaqna ang ata tutupa.

Ma-aq a takidaqvisan tu kattutuszang is minsuma tantungu ka tutuza tu kaqanimulmulun is miliskin, mapakasalpu pu-un tu, maldaqvis a dangi-an a, ni-i tu langat pulalanbu, mopa ta ata ka Bununtuza.

爸爸說，以前娶媽媽時生活貧困，天天吃地瓜或小米飯。剛好林班徵砍草和種樹苗，工作七天就回家，領工錢買白米，剩餘的錢買農具。

爸爸說：兒子啊！其實你有弟弟叫Qesul，因為以前沒錢，過給人收養，我好想他，將來若有錢，一定要去找他。後來爸媽相繼過世，我跟太太去找Qesul，與他相認後，我們緊緊擁抱淚眼婆娑，離別時再次擁抱和流淚，我安慰說，我想你時就來找你，祈願你身體健康，全家平安！