朗聲四起

Mazima naak masituqas munba-av malhaqu, tataqu tu na ni-i qo na heza tu tastusaba haan ba-av ta ka pailhaqu-an, paaq pu-un asa tu daqdaqanin munba-av haan ludun ta hiqiv i san biaq is heza tisduu, na minpuhuq is ni-i tu kavava-an siza.

Minus-an tu munba-av hiqiv a samuq is tishaqu-an i vanis a, na ma-aq qo ka ni-i ang mataz, idiip matesdadaza, huhuqhuq salaz, mangmang tu ni-i saak niap tu na piko-uq zaku mapataz i ni-i saak minadas i busul a, miliskin saak tu na tuza na lusqa uhapulan mevanis, tuza tu iskilim zaku batu mabatu ka, na ma-aq a ni-i tu tepatazun, miliskin saak tu na kusi-a-ak i via tesuqsuq mabatu mapataz a tangusuk ang matehunuk a tesuqsuqak i via ka, tuza tu tenahanun mumudan a tinsu-u matesdaza tiplaq mankauk, pastak haan dalaq a tinsuu vazakvazak haan nastu dalaq, mudaukdauk is-uka-an in is-aang a mataz in, uu ka u-uuk in silulu ma-olading haan qaluup maluqus, ama-uk mudaan munlumaq, manahipdengaz naak a qudas tu saduu mevanis, tupa tu na maka-ita dau saak tu matasqanup.

Minus-an tu tantatau saam munba-av ludun qanup, tonahaan in ba-av a, samuq is heza qanvang a sadu-an zami, tupa-uk a duma tu ka-a tu pataliva ki heza deza qanvang a, heza-a ka kamiing munhaan antanqedip istaa, asa ni-i tu sadu-anan istaa, uu ka, na munhaan saam antanba-aq istaa, antandeza ka tatini ka, na antan-iti saak malasung, ka-a tu tepasdu-un manaq i na biaq is sankula bunun, ma-aq is kitngaa in nepa musbai ka patasbanav ang nepa ka, santulunav in manaq, tuza tu pa-un ta zami malasung a latasban in tutuza ka, tetulunuk manaq a, tuza tu tinsuu ka qanvang a tintunqaz mataz, mundiip in saam amin saduu ka uka penaqan, samuq is tetuktuku-un temisqang a madengazan a, paaq pu-un uka sadu-an a penaqan. Uu ka tissesunsesun zami mama mudaan munlumaq, manahip a tastulumaq tu heza pinanaq.

Masantupa amin a bunun tu tutuza dau saam tu mamangan, mesiqabas inuka ang haan mita asang ti ka minanaq i qanvang, san zami in dau ka tesanduu manaq i qanvanglibus, na maqtu in dau saam maku-uni istii kintuhuq malastapang. Tupa-un zami tu na mopa pu-un i, inaam nepi tu tesaq. Tutuza tu manahipdengaz a is-aang tu madia bunun a matumasqing zami, qadang al mopin ta tu soqabasqabas masihal a tesaq, kadadauk is munba-av qanup tu mumuqna tesanduu manaq i qanvang.

我哥很喜歡上山放陷阱，常常告訴我說他在山上大概放了一百個陷阱，所以要每天到山上巡視陷阱，萬一有中到，動物有腐爛就糟糕了。有次巡視陷阱有山豬，裝麻袋背回家，阿公非常高興說，有遺傳他的能力。有次是三人上山打獵時遇到水鹿，我們輪流背水鹿回家，家人都很開心。