朗聲四起

Melibuntu in saam ni-i tu munhaan Lipung ta dulap tu sediip tu tudiip ang. Heza naak masinoba ka siza-un i Lipung, ihaan tupa-un tu Sinsuku ta, heza istaa uvaz-az tu dadusa, binano-az amin, na madadaing in i melibuntu in saam ni-i tu mun-ita tantungu. Madadaing in amin uvavaz-az naak a, asa dau nenkun munhaan Lipung ta dulap, ansasuu munhaan pantina-un ingtuun tantungu.

Taunadiip in a qani-an tu na mundiip a, munhaan saam papandu-ankusbabai ta tundaza kusbabai, mopa ni-i ang a uvavaz-az un tinundaza kusbabai ka, tuza tu manahipdengaz salaz, tinmamangmang salaz patataqu tu maku-aq a luhum nait qanivalval sadu-an, tonadadaza in haan asang i Tukiu ka maqaqenan tataqu tu sadu-an in a asang i Tukiu, tutuza tu mano-azdaingaz salaz sadu-an.

Munnastu in a kusbabai ka, tangus ang saam munhaan inai tun pantina-un ta, kitngaa in saam mudandaan, makahaan saam Mulinanga, makahaan saam Hukaizu, heza ang Sikuku siin Kiusiu ta, heza ita ka tumananu-un tu asangbananaz, ma-aq nenka ka, aza-aza sia malaletaz madidikla ma-a-anak i binano-az tu bananaz, al tupa tu qasaman a nanu ni-i tu tan-a kis bazbazan, paaq pu-un lusqa in havunun i binano-az tu mudana haan lumaq ti; lusqa in a binano-az a minkatini kasui, sikaka-un i uvavaz-az, punhanun pasnanava-an mapasnava teklas, medadaza sohaan pasnanava-andaing, heza ka sohaan vevi tu siduqdengaz mapasnava teklas, ma-aq is isnaqtungan in a tinsuu kedu-anan i mapapatas tu iskuzakuza, tutuza salaz tu malisihalsihal miqumis.

Munhaan saam tupa-un tu Huku-uka ta; telpitu in a, mesna-ita saam tunkusbabai musuqis munhaan Taivang ti. Tuza tu masihal dulap i maqansiap in tu samuq is mopa ta qan a.

Maqanuas a duma bunun tu sehaan saam Lipung ta, taqu-an zami ka duma bunun tu tutuza tu masihal is mundaqvis dulap, mopa inihaan a Lipung un haan Tevang ti ka, kamaheza naam sinpalasLipung a itqalun, taqu-an zami tu ma-aq saam a mesnaTevang minsuma, Ketnanu tu siduq, tupa-un tu Bununtuza, ma-aq naam a nastama ka mananu tu maqansiap salaz malasLipung, mopa me-uni issia Lipung tu malalasti. Ma-aq a tinan-a tu bunun a masantupa amin tu na tanam munhaan Lipung ta dulap, maqtu saduu ki vevivevi tu keno-azan.

我有妹妹嫁給日本人，她有兩個兒女。孩子們長大想去日本，順便看阿姨。頭次坐飛機的孩子非常高興，談論天空所見。下飛機後我們先到姨媽家，就開始走走，去了很多地方，一個禮拜後回臺灣。旅行好處多，可了解國外的發展，增添學識。