朗聲四起
masibalaiq ku’ Itaal ki’ maqiyanux ka’ qaqasinug cku’ babaw na’ rawrawq. makasawbih ku’ qaqasinug ki’ Itaal uwi.
masikayyung ru’ makimaniq cu’ qaqasinug ku’ Itaal cu’ cunga’ ga, humuwaag cku’ rahuwal ka’ hanang ru’ pungan nku’ qaqasinug ku’ hanang ka’ hani la. rarima’ ’i’ pakahtu’ cku’ bih nku’ Itaal ku’ qaqasinug la. humuq tikay cu’ kinuling nku’ qaqasinug ku’ Itaal. paqasun nku’ Itaal ru’ maqas uwi ku’ qaqasinug la ga, yani magiyai’ cku’ Itaal ku’ qaqasinug. sukuun cku’ limuk ku’ kinuling na’ qaqasinug. tuwangan cu’ raramat ru’ timu. umukan na’ abag ru’ siimag kahabaag ku’ naniqun. ini’ ka’ingasug ru’ tatalan ku’ qaqasinug ka’ makasiun cku’ balayan. sikatngi’ nku’ Itaal ku’ naniqun ka’ hani. iqat paka’uway ’i’ qumaluwap uwi ku’ Itaal.
qutux ka’ ri’ax ga, kiya ku’ qutux ka’ masasalaw ka’ Itaal. humuwaag cu’ qaqasinug ru’ tayhuk cku’ pug nku’ Itaal. humraq cu’ takiis niya’ ru’ manamanatiun niya’ ’i’ kumut ku’ qasinug’ ru’ alun niya’ ku’ hi’ niya’. asi anakuh ru’ asi manahaylag ’i’ magiyai’ ku’ qasinug. aqih a’ kisiliq niya’ ru’ kalun niya’ ku’ Itaal maha’, “mana’aring ’i’ kisa’ ga papagiyai’ cami cku’ kakian mamu ru’ iqat cami pakabalaiq ki’ cimu la.
nanaq ku’ lungulungun nku’ Itaal cku’ wawwaw naha’ . aqih a’ linanglung nku’ Itaal kahi naha’ na’uquun la ku’ minbalaiq ki’’ qaqasinug cu’ cunga’. babaw niya’ la ga, asiki makarux ’i’ qumaluwap naanq ku’ Itaal. yani pakakiya’ a’ naniqun naha’ la. babaw niya’ la ga, musa’ ’i’ qumaluwap cku’ lahulahu ku’ Itaal ga iqat naha’ ungii ku’ kai’ ka’ sinbil nku’ nanabakis ka’ aruwa’. ini’ usa’ qumaluwap na’ ga, asiki papakitalan naha’ cku’ sisiliq ru’ situbun han cku’ nanabakis nku’ Utux. naki pakabalaiq a’ hinakay naha’. gumlug cku’ gaga’ na’ pisaniq nku’ Itaal kahabaag la ga. yani pakabalaiq ku’ Itaal ki’ qaqasinug cubalay la. pa’aruwa ’i’ balaiq ku’ qinaluwap nku’ Itaal la. cku’ kaal ka’ hani la ga, ani masiukas la ku’ gaga’ nku’ qumalauwap nku’ Itaal ga, laxi cubalay ku’ kiya aqih ka’ inlungan.
以前泰雅族人只會取少量獵物的毛放入鍋中煮，便可看見鍋內滿是獸肉，泰雅族人就可以飽足，不必辛苦打獵。
只因驕傲貪懶的泰雅族人割下獸肉，動物很不開心的說，以後你們得進入更深遠的山林辛苦狩獵，神靈從此不會再允許泰雅族人像從前輕而易舉便能得到獵物的恩賜。此後，泰雅族人狩獵前便會以占鳥卜卦並遵守狩獵禁忌，唯有泰雅族人與生物達到和平，泰雅族的狩獵也才會更好。