朗聲四起

ana mku’ung knxan ta maki babaw uraw hani ga, kyan myasa lpyung ta ga cmyax kwara ku tu’i knxan ta la. baha mcwa myasa lpyung ga yani ci wagi cmyax, cyaxan nya kwara tu’i ta ru iyat ta mosa tkari. ana ga kyan ya’eh lpyung ga ana cmyax wagi ga rasun ta nya miyuk sku ku’ung tu’i.

myasa lpyung heya ga iyat ba’un bayi lungan naha, kahun ci cahuy lungan naha mwah slpyung ita. ya’eh lpyung heya ga nyu mwah bayi lungan ta, siga maki myasa yaw su ga sle’un su nya, ungat myasa yaw wahan naha mani lga pyaran ta nya kwarra la.

khani ta myasa lpyung ga siga kahun lungan ta nanak t’aring mosa mtiyaw. te utux yaw ga, ini ta hmut kmayan ya’eh ke, ya’eh ke ga nyu mwah cmla sku lungan c’oli. myasa ke skayan ta c’oli kryax, maha ta kaca ga, mosa mwah ksobeh ita c’oli ru ba’un ta mita ima ku myasa lpyung ta.

te sa’ing yaw ga, khani ta myasa lpyung ga ini ta hmut mciri sku c’oli. myuhung lungan ta krayx ga pgyarun ta nya kwara ana ima c’oli la.

myasa lpyung ga kahun sku thway lungan ru sbalay lungan mwah mita. thway lungan ta ga piyux c’oli mwah ksobeh ita, kyan sbalay lungan ta ga mosa naha ba’un mtia ku ini ta hmut mciri c’oli. nanu yaca ku mosa kyan myasa lpyung mwah ksobeh ita.

te tugan yaw ga, khani ta myasa lpyung ga siga kba ta pgaluw ru prraw c’oli. san maha myasa lpyung ga ba’un ta mita lungan, gmaluw ta c’oli ga sgaluw ta nya c’oli uyi, ini ta galuw c’oli ga iyat ta nya sgaluw c’oli uyi. myasa lpyung ga ba’un nya mita kyan kn’wix ku knxan ta, ini ta nya sbuling maki cka na m’wix knxan ta, mhtuw ’ba naha mwah hmoluy ita, mwah prraw ita shri sku m’wix knxan ta. nanu yaca ku myasa lpyung ga kahun ita nanak t’aring mtiyaw, kba ta pgaluw c’oli ru prraw ta c’oli.

puting nya lga, khani ta myasa lpyung ga iyat r’tung ryax ku slpyung ta, myasa lpyung ga beta ana knwan kryax. myasa lpyung san ta ga iyat nanak micu hani texan ta, myasa lpyung ga ruyux knxan ku slpyung ta, aring ta mrkyas ru beta bkis ta ga, ini p’eyu lungan ta ga nanu yaca ku san ta myasa calay lpyung.

即使生活籠罩烏雲，好朋友就像陽光，照亮前面道路不致迷失。壞朋友，即使陽光普照也會走在黑暗道路。

要交好朋友就從心裡做起。首先，結交好朋友就口不出惡言，那會傷害人心。口出良言使人親近。其次，結交好朋友切勿與人爭鬥，遭人遠離。好朋友能彼此相愛互助。愛人者人恒愛之，助人者人恒助之。好朋友不置人危機中不顧。最後，好朋友是一生一世的事。好朋友不看現在，而是看一生，從少年到老年，友誼不輕易改變才是真正的好朋友。