朗聲四起

taskun a Anuu mas tama kausian huma, usaduan a Anuu mas itanangaus tu dakus tu aizaan mas hazam. maza ngulus siiin bantas hai madanghas, haitu matahdung a isaicia lutbu. Paha kamingmiing a saia tu kaudiip namakupacingku mapanah mas hazamcia.

“namapikuas!” cisha aiza a sing’av maszang mas cipciah tu busul tu nataibulah mas ituAnuu tu tangia, aat makataihcingun a isaicia tangia, paha panlunghu a Anuu aat sadu mas tamacia tu mikuabin i?

Haungunun a Anuu mas tamacia tu, mazava a kasu namapanah mas haipiscia i? antalam a Anuu tu, mavia’ik tu nii tu mahtu mapanah mas haipiscia i? matusuhdung a tama tahu mas Anuucia tu, nii tu kaazsu nii tu mahtu mapanah mas haipis. Masamu amin a Bunun mapanah mas haipistan, aupa tumananuun a haipisan tu hazamsial.

Kata mais pismaduh, pis’acipul anis masuaz mas vaivivaivi tu sinsusuaz hai, supah a ivutaz kaudiip namaun mas imita tu sinsusuaz, supah a hahapis kaudiip namapinkuang mas sinsusuaz, haitu katsian huma a haipisan, mamaun mas ivutaz, mindangaz mas mita saipuk mas sinsusuaz, paha makuang mais mapataz mas haipistan.

Maza haipisan tu mininhumis hai ituDihain amin sinkalun tu namapibauszang mas dalahcin. mais minaun a naia mas vaivivaivi tu iktuus siin supah tu auhsa, aat utakiun mas naicia maisinin sian duma tu dalah hai mintalukai a iktuusan anis auhsa’an, mahtu a sain tupaun tu mindangaz mas mita masuaz. paha asa a kata tu mapisial mas haipistan.

Aizaang tasa hansiap, asata Bunun tu malhahaiap mas saitan tu pailungkaduan. Masa habasdaingazang tu laning’avan a dalahan hai cis’uni tu macinvavaa amin a bunun tungkadang sian ludun, haitu uka tu tacini minadas mas patus aat uka sapuz. haitu haipistan mindangaz mas imita Bunun tu mailintangus kaudiip kilim mas sapuz aat adasun mas saicia a sapuzan isaiv mas mastatala tu Bunun. Masa isian ma’adas sapuz tu daan hai, misdanghas a isaicia ngulus, misdanghas amin a isaicia bantas, musasu tu mistahdung a isaicia manauaz tu huspil, paha atukalakinun ii kisluasan a buthul aat misnuas a maimasling tu sing-av.

Unnung’unung a tama tu: maupacia a haipis mindangaz mas mita tu Bunun, masaiv mas sapuz, mahtu tupaun tu saicia a mapatal’ia mas Bunun, asa kata tu haiap masaunbaas.

Anuu跟父親去耕地，看到有鳥，就拿著彈弓準備射。父親生氣跟Anuu說：布農族忌諱射殺haipis鳥。haipis鳥會幫我們抓蟲、照顧農作物，所以，禁止射殺haipis鳥。haipis鳥也是上天派的使者，當haipis吃了植物的種子，到別的地方排出來，這些種子發芽了，也幫大地播種。

我們布農族一定要知道以前的歷史。以前洪水時期，沒有帶火種，是haipis帶來火種而燒紅了嘴與腳、燒黑了羽毛、燒壞了喉嚨，喪失美妙的歌喉，幫助我們，我們應該回饋。