朗聲四起

mita’ ray ’oemaeh ’akoey ’ima ’okik hingha’ ka Sinrahoe’ ’ima rowaSek, hayza’ ’oyaeh  ka ’ima ’okik hingha’ ka kaspengan ki kinbaezae’an, kate’enen Samiyan ma’’okik hingha’, ’akoey ’oyaeh ka pakSiyayan ka hahila:

kinSekla’an ’ima sobae:oeh kapakSiyayan hahila: koSa’en SomaSo’ ka tinal’oemaeh hahila:! hini ma’ hayza’ ’oyaeh ka kinbaezae’an, kakhayza’an ’aehae’ hito’, So: ’am SomaSo’ ka tinal’oemaehan ’ima maybi:il ila ’aehae’ hahila:, ray ’asang mowa:i’ ’aehae’ ka ’ima sopaloy ka Sinpanan, ’oeboeh ’inaro’ o paktikot ka mae’iyaeh, mowa:i’ ray ’asang somi’ael ka Sinpanan nak tata:a’ a bibi:…nisiya’ ma’ ’aemeten hahi:il, taew’an pinamowa:an pa’aewhayen hahi:il, mae’iyaeh ma’ tikot a tomal.

hayza’ ’aehae’ hahila: ’am SomaSo’ ila ka tinal’oemaeh, ray ’asang mae’iyaeh hingha’ ’am rima’ ila hoSa:il ’ino hiza’ ka Sipanan, kita’en miwa:i’ ’aehae’ kamaSawya’ mae’iyaeh, mowa:i’ Somawya’ ka si’aelen, ’aehae’ koko’ komita’ mobe:ay hisiya’ kasi’aelen, mayaka:i’ Sa’: “’ampowa’ ila So’o ’okik rae:iw ”, kamaSawya’ mae’iyaeh tiSkobae:oeh hi koko Sa’ paSir’al ’iyakin ray kanSo’ taew’an, yako taSowaw ka ka hiza’ ’ima ’aewhay ka Sinpanan ” siya ’ana ni koko tak’ino’on ’am mayaka:i’ ma ’oka nanaw, powa:aw koko’ nonak ma’ rima’ ila hoSa:il.

’aring ’isa:a’! So: ’am SomaSo’ ila ka tinal’oemaeh lasiya’ Saro:ol ila, nisiya ka pinatawaw, ’ima ’aewhay Sinpanan ma’ ’okay wa:i’ ila ’aybel nasiya ka kin’i’iyaeh. So: SomaSo’ ka tinal’oemaeh mowa’i’ minay ’aehae’ hahila:, ’asang mae’iyaeh ma’ somapih ka ’ima ngangilaehan ’ima SaSo’ ka kayba:en, manmanra:an ray ’asang, babebe:ay ka ’ima kayzaeh ka ka:i’ o mobe:ay ka pinotoy noka ’ima ngangilaehan ka rayhil ’ino korkoring, ’iwan ’am mobe:ay ka ’ima’ kayzaeh ka hino’alo’, tabin ’isa:hini SomaSo’ ka tinal ’oemaeh ray kin’i’iyaeh mita’ ma’ Sapang ’ima sobae:oh hahila:

這片土地上有多元族群與文化，流傳著各種節慶傳說。有個村莊每到除夕就有怪獸「年」來襲，破壞農作、吃光牲畜，村民只好上山避難。某年，一位老人來村，婆婆給他食物勸他離開，老人卻說能趕走「年」。除夕夜，「年」獸闖村，卻被婆婆家門上的紅紙、屋內的燭光與爆竹聲嚇退。原來「年」怕紅色、火光和聲響。隔天村民得知真相，紛紛模仿。從此每逢除夕貼紅對聯、點燈火、放鞭炮；初一早上拜年問好，代代相傳，成為歡慶新年的方式。