朗聲四起

kakhayza’an hayza’ mae’iyaeh ’aring ’ima ’ol’oelae’an ra:am a tomal ka tae’oloeh o so:wi’ a tomal, rengreng ray ’asang tomilihlih ki siya ’ima hahingha’an ka tinal’oemaeh mae’iyaeh, mam makakSiyae’ rengreng nisiya pahangihin, ray ’asang mae’iyaeh ma’ ra:ama hahi:il hisiya’.

hayza’ ’aehae’ hahila: siya manra:an manra:an ’okik ra:ami’ mowa:i’ ila ray ’ima ’okik Sekla’i ’asang, komita’ Say ’isa:a’ mae’iyaeh sin’elan hingha’, somi’ael ’ampowa’ pa:’aephael nanaw? lobengez somingozaw Sa’ “moyo ’ampowa’ tomalek kasi’aelen pa’aepheel nanaw,’okay si’ael ka Sapang tinalek ”, kamapa’aephael mae’iyaeh tiSkobae:oeh hi siya’ Sa’ “ yami ’oka’ ka katozekan powa:aw, sini’ael ’am haSa’ kas’oehaz a ” lobengez Sa’ ” ’iwa’ ay! moyo pa’aephael.

lobengez ’okik Siwa’ ’am patopa: “ moyo kita’ ma’an Sisi’ael koza’ kin kayzaeh si’aelen” lasiya komita’ koza’ kin Sarara’, somingozaw Sa’, ” niSo’ sini’ael Si papay’ino nay? lobengez toma’aes ka haehngae’ Sipakita’ hi lasiya Sa’ “ kita’ ya:o hayza’ ka katozekan, ma’an sini’ael mayhini Sisa’i’ ma’ ’oka’ ila, So: moyo ’am nak ’iyakin, wa’ila! ya:o tapakhayza’ ka katozekan ’inimon ” kamapa’aephel ma’az’azem ila!

mowa:i’ ’aehae’ hahila: lasiya mowa:i’ ila komi:im hi lobengez Sa’ “yami’ ’am tomalam pakhayza’ ka katozekan, So’o paskayzaeh ’iniya’om ”! lobengez mari’ ka patonay Saehoe’on ray haepoy pa’iSngangilaehen ’isa:a Sitotoh ila ka katozekan nasiya, kita’en ’aehae’ ’aehae’ malbel ila, lasiya mayaka:i’ hi lobengez “ ’ampowa’ nakhini? siya tiSkobae:oeh Sa’ ” honhae:i’ ’am hekla’ ila o ” lasiya paka:i’ nisiya pinayaka:i’, SikoSa’ ma’ masay ila,’aehae’ ’aehae’ nisiya pakpasayen,’aroma’ mae’iyaeh komita’ bi:i’ a tomal, rima’ ila Somowaw hi lobengez, siya ra:am ka ta’oeloeh, maraS ka kamti’ hoSa:il ray horoe’ ’i:zo’, nasiya totohon noka boehoe: kita’en ngangilaehan pakoSa’ ramo’ nisiya paSopasay ila, SikoSa’ ma’ kamti’ kasnaw ’ima lomowang.

bi:il ila lobih ray ’asang nisiya, hingha’ siya mayaka:i’ ray ’asang mae’iyaeh Sa’ ”yako wa’isan mina! moyo mari’ ka boehoe: panae’ ma’an ka hima’ mina ’am ’okay nak’ino’,” SikoSa’ nisiya ray hima’ ’i:zo’ ’inaSkan ka patonay,’okik ra:ami ni minayti’ ni siya SiSokabih ka ka:ra’, SiSopasay ila, malbel kita’en sem’el ila ka bengez.

從前有個聰明又頑皮的小孩lobengez，常欺負同齡孩子，人人皆知。有天他到一個陌生部落，那裡的人只吸蒸氣不吃食物，因為沒有肛門無法排泄。lobengez炫耀自己有肛門，還能幫他們做一個。他用燒紅的鐵條刺他們屁股，未被騙的人大怒，追殺他。他帶著薯榔逃進山洞，用薯榔擋洞口，敵人以為流出的汁是血，以為他已死。lobengez逃回部落，仍自誇能耐，甚至挑戰他人射箭，沒想到弟弟射向他的心臟，當場倒地，長出紅芒草。