朗聲四起
Itiya ho, misatapang misanga’ ko Kawas to kakarayan ato sera, o pakayraan a saka’orip no manmaan a pinanowan i, mapasetek to. O roma i, mapafeli to to sakatayal a ma’orip cangra. Malecad komaen to rengos ko siri, pafelien no Kawas cingra to sapiilang a fitoka; komaen to fao ko takola’ pafelien no Kawas cingra to micipatay a sma; mihedot to remes ko likes, pafelien no Kawas cingra to mimingay kakaya’:ay a ngoyos. O manmaan a sakatayal maherek to a misilsil ko Kawas, deng to ona kafahkaan a mata. Cecay kapi a mata i, to romi’ad ato dadaya manga’ay a pakanengneng, o cecay kapi a mata i, deng o dadaya ta manga’ay a pakanengneng. Saka itiya i, deng o posi ato ekong a malikaka ko caayay ho pakaala to saka’orip a sakatayal.
Sakatosa a romi’ad, tahidangen no Kawas koya posi ato ekong, mapafeli alacecay dimata’ to panay cangra, sowal sa, “ Oni tosa a dimata’ a panay maemin o papawalien, alacecay dimata’ kamo tatosa, aka pa’oraden, mapa’orad ho molengaw ko panay!” pakatengil koya ekong tangsol to madefit minokay a mafoti’, sasowasowalen noya posi cingra caayay to pisikol, awa to ko pakayraan no posi, sateked han to no posi pasadak a pawali.
Sakatolo a romi’ad ira to tayni koya Kawas, molengaw to ko cecay a dimata a panay manengneng nira, sowal sa, “ O panay no posi konini? ” han nira, pacaof sa koya ekong, “ Hai! Kalafoti’ ko posi, mapasenger to ko panay,” han nira. Paca’of han noya Kawas, “ Ekongaw, wata ko piharateng no posi i tisowanan, patati’ihen no miso a somowal cingra, tawa han noya Kawas a somowal, pakasa’efit kiso takowanan haw? a matira aca yo pakanengnengay to lalosidan a mata to dadaya pafelien ako kiso, nawhan manaay kiso to mata to romi’ad. ” han no Kawas a somowal cingra.
Tangasa sato anini, deng to o dadaya ta pakanengneng to manmaan a lalosidan ko ekong. Masamaan to koya fangcalay ko faloco’ a posi saw? Pakalayap to cecay kapi fangcalay a mata cingra, to romi’ad ato dadaya maemin mahapinang nira minengneng to masamaanay a lalosidan.
天神賜給動物謀生的工具。只剩貓和貓頭鷹還沒有得到謀生工具。天神要牠們擔穀子去曬，不能讓雨淋到，不然穀子會發芽！貓頭鷹直接回屋睡覺，貓自己把兩擔穀子搬去曬，天陰怕下雨，貓叫不醒貓頭鷹，只好先收貓頭鷹的穀子，但自己的穀子已發芽。貓處處為貓頭鷹想，但貓頭鷹卻對天神說，貓因為貪睡，穀子才淋濕，天神只給貓頭鷹夜裡可看見的眼睛。直到現在，貓頭鷹只在夜裡看見東西，而好心的貓則得到一對好眼睛。