朗聲四起

hayza’ ’aehae’ hahila:, kapapama’an maray ’aehae’ ’ima ’inaro’ o leheh ka ra:an. ray ra:an kabih o kabih, pinamowa’ saboeh ka pazay, pinatiyay maowahil a tomalan, ’ikahabiyalan saboeh. kita’en nakhara ’am kayzaeh ila kipazayen! pazay sin’elan nak ’ima lohaha’o: ka pazay, ra:amen Sa’ hiza ka pazay koza’ kin mabaeh ka SiSi’ kin Sil’i: kita’en. hini ’ima mowahil pazay hayza’ Sinan’pispisan ka SiSi’ noka pe:es, kita’en ka pazay sin’el hayza’ ka ’iniya’olpoeh ray kalihokan, pe:es ma’ ra:am raraylis ka kasi’aelen kil mae’iyaeh. ’iwa’ noka mae’iyaeh pa’iri:i’in ka mae’mae’iyaeh ray pinatiyay wazwaz. ray kalam langi: kita’en ma’ hayza’ ka tiniway ka kangkang. So: mabaeh ila ka pazay ma’ towa’isin paySiri:in ray pinatiyay koSa’en miyape:es. So: ka pe:es mowa:i’ ila somi’ael ka pazay noka mae’iyaeh haehli:in ka kangkang, kangkang ma’ kakalongkong homngas, pe:es bazae’ ma’ homayap rae:iw ila.

Saehpi:ih ’ima piza’ ila ka hahila:, may’isaza naehan ray pinatiyay, kita’en lasiya mam kipazay ila. pazay pinamwa’ mowahil a tomalan, ’anoka hima’ kipazay ’am hoenaehnge: ka hahila: sizaeh. nasiya ’anoka kikay monpilaz ka ’am lalobihlobih honha:i’ ma’ sizaeh ila kipazay! ray kabih ka ba:oz, pe:es ray kinipazayan sosmi’ael ka ’inonhae:ae’ ray ra:i’ ka kamez. komita’ ka pe:es honha:i’ homayap babaw honha:i’ kaSra:i’ somi’ael ka SiSi’. honha:i’ rini’ kabih ciit Sa’ honha:i’ riza kabih ciit Sa’, nakhara ’ima Siyae’ komoSa’, “kaysa’an kin kayzaeh ’oka’ ka mae’iyaeh mowa:i’ Somowaw koza’ kin kayzaeh!” ’okik ra:ami, ’inay’ino’ ’ima kas’oehaez ’iniya’elngih o ’inyabolalas ka ’aehoe’, Sahoero: ka ba:oz ki pe:es mowa:i’ Somowaw ila! ba:oz ki pe:es homSeS kakamoeh homayap rae:iw ila.

hini ’isa:a’ ray pinatiyay So: kipazay ila ma’ hayza’ ’ima pakaysawa’an ka kinita’. ’oka’ ila ma’ pakSekla’ ka minahael, kamaSomopazay ma’ hopay a tomalan, kayni’ kapinatawawan pak’a’abaSen, lasiya miyalawa’ ka pe:es, ’ita’ ma’ rengreng papahoero: hi nonak, ’izi’ ’aS’aSay ka kasi’aelen mita’.

有一天，車子經過一條又長又直的道路。兩旁一片黃澄澄的稻子，麻雀也跟農人們搶食。田中央立了好幾個稻草人；田埂邊有一段拉繩，上面掛了好多的空鐵罐，麻雀飛來時，農夫就拉繩子，罐子嘎嘎的響，嚇跑麻雀。農夫們正在收割。一旁來了好幾隻鴿子、麻雀在田中央啄食田地的稻粒，麻雀上竄下跳這裡嘰一聲、那裡嘰一聲，忽然冒出狗，把鴿子和麻雀嚇跑了！

這是稻田上稻米收成時的有趣的景象，讓人們了解農人們的辛勞，且不可浪費食物。