朗聲四起

haba:an ila kin rikrika: a tomalan! ray latar pinamowa’ ka pongaeh noka hahila: tiShayayo’on ila, tabin ’iyaSamSem hayza’ ila ka mae’iyaeh lobih, o ’okay Sahoro: ka pongaeh ’am hayayo’ ila! baba:aw lobih minSa’la’ matawaw ray taew’an ka howaw, ’ina komSa:o’ ila, rima’ ila ray latar pahaba:i’. komita’ ka pongaeh, kaehoy. ’inokay poralomi hayayo’ ila saboeh, ’omam’amoeh mari’ ray kabih ka ’a’aro: poralomon, hayza’ ila ka ralom pongaeh honha:i’ tileheh ila ka hanSan, pongaeh ma’ ponkazikaz kayzaeh ila kita’en. ’okik ra:am Sa’ hani ray pongpongaehan ’i:zo’ kin ’akoey ka rineme:, hayza’ ka ’iniyangangilaeh, ’iniyabolalas, ’iniyapeznges o ’iniyabiyal. ’i:! hiza ’ima bolalasan ka pongaeh kano’ ila kaehoy? ’ay! yako mahoero: ila! hiza ma’an to:o’ ila tinal’oemaeh pinamowa’ ka kahoey noka kapi:, ’isahini ila minpongaeh! Singowip ila ma’an. hini kahoey noka kapi: So: ’okik ka’inpongaehan ma’ ’ika hes’ezan saboeh, pakakaehoyon ma’ kayzaeh kita’en. yako hon’alih somazek ka pongaeh, ma’ kayzaeh siya: sazeken, ’iniSpapongaeh kinhinowa’an ma’an.

yako Sakaykayzaeh ila komita’ hini ni nonak ka pinamowa’an, ’akoey ’inokik Sekla’i, o kayzaeh saboeh ka sin’el. naw maSa:eng ray kabih komitkita’ ka pongaeh ’ima koza’ kin kayzaeh howaw.

yako riza ma’az’azem, kawaS kin rikrika: honay latar pahaba:i’, milkashaw, komita’ ka pongaeh, komita’ ray kawaS ka bintoe’an ki ’ilaS ma’ kin kayzaeh. kaysa’an ’aehae’ kinhae:wan ray kawaS babaw ra:nawan kita’en, ’ana sowiti’ ’oka’ ka homom, ka bintoe’an ki ’ilaS ma’ kin tilka:an ila kita’en.

hini ’aehae’ kinhae:wan kin ’aliman, bazae’en ka SibSiba:i’, takem, o kabkabaehae: ’ima homngas, hayza’ naehan bazae’en “ ’a:ak” Sa’, yako Sekla’ hiza ka hako’ ’ima homngas. hini mama’ ma’an ’ima manabih ’iyakin, yako ’isa:a’ Sekla’, mama’ ma’an kama’alep mina!

’okik ra:ami ray latar minaSa:eng Sahpi:ih ila roSa’ kakita’an ka hahila:. Sangay ila o! ’i’ini’ kaS’abo’ yako komita’ naehan ka pongaeh, kahoey noka kapi: tiStilka:en noka ’ilaS, kita’en ka hanSan kin leheh, ka pongaeh ray ’iniyahes’ez ka biyae’ ’i:zo’ ma’ kinbolalasan ila.

氣溫越來越高，花兒已經快要乾枯，忙完家事直到用過晚飯後，到院子裡乘涼時，才發現花因為缺少水分而枯萎，趕緊拿起一旁的水管澆花，得到水分的花草一會兒挺直了枝幹，綻放美麗，有紅、白、紫、黃，色彩真多！綠葉彩花非常迷人。

咦！那棵白花是什麼植物？啊！那是三年前移植的咖啡樹，現在才開花呀！我都忘了！咖啡樹不是花季時整株是綠葉，當成盆栽也很好看。靠近白色的咖啡花，散發清香的味道。看了看院子裡，還有很多叫不出名的花、草，長得都好看！坐在一旁欣賞是件美好的事。

安靜的夜晚，蟲鳴聲、青蛙叫聲、有不知名的鳥叫聲、還有「啊」一聲的動物聲，叔叔說是山羌的叫聲！

坐在院子裡已兩小時，進屋前，我望了望院子裡的花草，月光的照射好像聚焦在咖啡樹上，顯現咖啡樹筆直的樹幹，在綠葉的襯托下花兒更白了！