朗聲四起

muwaza ya tamak ta qenabinnusan ta, yau muwaza sasikawman ta tu tamak. azu ti sikawman na Rulam, mipil ita tu “ Rapedadaw ay sudad ” ussa sikawma tu maken ay tamak na sudad Rapedadaw zin na. timangu nisudadan Rapedadaw zin na patenaqu, nazau ay sudad qasukaw temita ya sunis, wan ma Raya ti tasaw na ay qanengi temayta. senayau nani, siwaway ya tama, yau imi na tamak.

suppaRan su azu siqudus isu tu tengen ay, taytan na ’daq qiwat ma isu taytan. ussa wan ma qudus yu, lubung nayau qaya. azu tengen lubung na lazat ’nay, azu mebakes, meqiwat izip na, nayau tenaytan na ’daq.

azu matiw isu sa naung semaqsaqay, muwaza qaytisan ay ta suwayan seRay ta paRinan. semanu baqian timaimian, “ satamak tu tebaRi ay simau, satawaR ka pasi temawaq ay! azu siqqay, paqaw seRay qeluqut nayau qaya qasatawaRan. ” senayau, miza ita tu tebaRi ay dingki paqesuppaR tu lazat, “ satawaR ka! ”.

Rapedadaw semanu tu lazat tu satawaRan qaya, azu ta tukayan yau kelawkaway ay tabalan na tu Rapedadaw ay Rais, semanu tu qaqaytisan, naRin mezaki. Raqana pataz ita temayta tu Rapedadaw ay Rais basayan na, suppaRan ta ti yau semangsangi ay tazian, naRin mezaki.

imi na puli ay tamak nani, “ nengi ti ” “ nengi ” zin na. azu pasaqay ita tu qitun ta lazanan, temayta ita tu tebaRi ay dingki, tumqez ti ya qitun, utuby seRay lazat. meliway ti tu puli ay dingki, qawka qanengi ita pasa ngayaw pasaqay tu qitun. yau pama zuma, muwaza kisasa miza tu puli ay tamak, paqesuppaR tu lazat Ribang zau saqangian na banang ta, ussa temawaq ay.

pataz ita temayta tu busaR ay qudus ta isingan, siqudus tu maRung ay, busaR ay qudus ya ising. taytan ta busaR ay tamak nani, kasianem ti ita, “ medames ”, “ saqangian na izip ”, “ mai dasam ” nazauan ta kasianem. wanayka, ta wawayan na busus, Rulam, yau mepatay ay yau zuma busaR ay tamak na qudus na, paqesuppaR tu zuma ay lazat yau mepatay ay leppaw zau.

yau muwaza imi na tamak, qanengi ita miza tu tamak semanu paqesuppaR tu mazemun niana ngidan ta sikawma.

生活中有許多色彩，顏色具有許多意涵。穿黑色的衣服看起來比較瘦，人的膚色較深，看起來比較精壯。阿公曾說，山林中，色彩鮮豔與紅色的昆蟲、爬蟲類可能有毒。我們會用紅色的燈來提醒小心！黃色也是請大家注意，表示危險請勿靠近。綠色通常表示「好」、「可以」，如「綠燈行」，綠色也代表環保。醫院經常看到白色衣服，有些文化白色則表示喪事。

知道這些顏色相關的知識，就可以用顏色告訴人們我們的想法！