朗聲四起

sekawalu setangi, mammaq ya deddan. temuqaz iku tu naung mawRawRat, yau adam satezay ta paRinan, yau tiziq semuni ta suwayan, yau biyat melaliyaz ta betuqan.

ta kinilan yau iRuR qaya, tutu ti, ngid iku qatiw sa iRuR qawRat tu zanum. maseq iku tu iRuR, melalazuk iku menis tu qudus seRay kun, medutiq pasa zanum. “wa! tuRpus ya zanum! simunang qenabinnus ku!” zin na anem ku kasianem.

yau iku ta iRuRan menananguy nani, pamemeng matayta ku yau ussiq maRung ay, azu qelizen mezaki timaikuan. manna yau tebaRi ay qelizen ta lauzan na paRin ’nay? paqangian ku temita, ussa yu! ussa qelizen ’nay, maken ay siqqay ’nay! azu tebaRi ay qelizen ya lidam na.

maytis ti iku, ngid iku pasa qazqaz RaRiw, sakelalez ya bettu senulal, azkaw! mesuRaw ti iku. muRetut ti, medutiq iku muman, ta kinilan ta bebettuan yau muwaza siqqay Raysezang.

ta tebteban yau ussiq siqqay, pasa babawan na uRu na. taytan ku azu paazasan na siqqay aizipna, azu huygian na qaniyau setangi. satatawaR iku semaqay, maytis iku buRibuR ta qaniyauan, mangay temazuz ya siqqay timaikuan. kasianem anem ku tu satawaRan, timangu mai satawaR, temapiRaw ti iku muman tu bettu. niz ti pasazi timaikuan temayta mezaki ya siqqay. saluna pa iku naquni aka semaqay qawka qanengi temanan zin na anem ku kasianem.

“ qusayza, tabalan na ti na siqqay ya lazan ku, Rayngu ti iku tanan, quni aka ti temanan? ngid ti qatama ya sezang, azu tedem ti, padames ti qaqaytisan.” zin na anem ku. mamaRaw iku tu kinil, matayta ku yau bates ta kinilan, tebesan ku mala, pitpitan ku biRi na, azu ti maRung ay Rais.

qiwiqiwan ku bates ’nay, qeminunugn tu waway na siqqay semaqay, sikawma iku tu “ siqqay, siqqay, ussa iku sapazeng semuRem tu lubu numi, mai iku ngid buRibuR timaimuan. azu suppaRan numi ti si, palaziw iku tu lazan temanan ya. ”

mai metennes, nantutungus ti pasa tisin semaqay ya siqqay, palaziw tu lazan, qawka iku suppaR temanan. lanas zau, paqesuppaR timaiku tu qaninanan ta nianiana semapang binnus ay, sumRuz ay ta qatian.

現在是夏天，天氣炎熱。我爬山去玩耍，有鳥兒在樹上歌唱，有蟋蟀在草叢鳴唱，有青蛙在湖畔鳴叫。

中午的時候，我去河邊玩水。我到達時，趕快脫下身上的衣服與褲子，跳進水中。

當我正在河中游泳時，突然看到一條長長的東西朝我靠近。為什麼那個繩索的前面有紅色的線？我仔細一看，那個不是繩索，那個是一條真正的蛇，紅色的線是牠的舌頭。

我想要跑到岸邊，我太過害怕就跌倒了，石頭上都是青苔。我又再次嚇到跳起來，還有很多蛇在我旁邊，牠們在石頭上曬太陽。

路被蛇擋住了，如此下去無法回家！於是我將藤蔓的葉子拔除，並晃動藤蔓，模仿蛇走路的方式，同時說：「蛇啊！蛇啊！我不是故意闖進你們的洞穴的，我沒有想要打擾你們。請讓路好讓我回家吧！」

不久，就往路邊爬去，讓出路來，我才可以回到家。這件事情告訴我要尊敬萬物。