朗聲四起

Dehuk saya de, ye ba wada hmrinas mspatun knkawas kmaro habung ka seediq alang miyan Gluban di. Ye kndalax so sknuwan prading kmaro habung ka alang miyan Gluban, nii mu ini kklai di.

Bale ba we, uka miyan kesun gaya kmaro habung nii ka yami Seediq, lnlungun mu saya dige, malu ba dmoi gaya kmaro habung duri mesa ku naq lmngelung. Anu ka yami Seediq ge ini nami chungi nrudan miyan, smparu miyan qmita ma kmdamac nami nrudan rui. Ma uka gaya kmaro habung rudan miyan cbeyo? Mesa ka rudan miyan, “Ini tnpusu kingal alang ka rudan cbeyo, mrana seediq tnaalang de skkingal qpuruh alang mtheruy uciicil ka duma denu; theya tnhrigan daha de uka daha yyahan kmaro ka habung nrudan daha denu; uxe duri we, yahan kmremux pais alang daha ma daan so punu alang dige theruy icil duri denu.”

Saya di we, rmabang hbaro seediq alang meyah kmaro habung daka meyah smmesung. So seediq alang gaga meepah nganguc ma mqedil wada seno icil, desun daha kana laqi ma laqi lqlaqi daha. Meyah pgkela alang nniqan pusu rudan ma pgkela ddadan alang. So nii de mgkela ka lqlaqi daha ma mggaluk lnglungan laqi lqlaqi kingal lutuc; uxe wano tndadan nanaq ka meyah mgkela duri. Kana llaqi alang Gluban ma kana dangi ndesan daha, qrasun mu riyung qmita ka seediq alang Gluban meyah kmaro habung nrudan daha.

Ani naq kesun pnuyu nami Plmukan ka kmaro habung nii we, ini miyan asi snegul gaya daha kkaro habung. So ddoyun daha qrengun smseman, rosoku ma pstepiq, ini nami pyui ka kiya, anu tnugiyo ba snhii Utux Baro ka yami Seediq saya, ddurun miyan duri we dmurun nami Utux Baro ma nrudan nami; ani so nii we pntnaun miyan qmita ka gaya taxa, ini nami kccei ma ini nami phlisi, mtbale ma mggaalu kana ka ini pntena gaya. Niqan knmalu gaya na dheya we ngalun nami hiya, ngalun nami de spooda miyan Gaya nami nanaq psgao dungan; ini nami asi pgyui ba bale, bobo na de mmaha Gaya nnami nanaq ka kiya denu. Malu bale ma, qrasun mu bale ka pnuyu miyan gaya kmaro habung nii.

清流部落族人進行掃墓已超過40年，我們賽德克族沒有掃墓節，但有掃墓的節日是件好事。近年，在外地工作的族人或嫁到外地的女子，每逢掃墓節都會攜家帶眷回部落掃墓，讓其子女、子孫知道父母的根源，與部落的親戚認識。了解家系與親屬關係，凝聚宗族的向心力。

本族信奉基督宗教者眾，祈禱時也向天父和我們祖靈祈求。從Gaya出發融合成為我賽德克的祭祖、掃墓的儀式。