朗聲四起

Spruun riyung mita yami Seediq ka kesun Gaya nii. So rseno mosa tmlenga lmiqu, asi ka madis lubuy tabuk, asi ka mkela mita sepi ma mita sisin. So laqi mqedil, ini pqdali palic rodux dbubu daha kndalax sbiciq, uxe pkela tminun denu mesa.

Ani si laqi saya, ini kela mesa maanu ka Gaya, uka ta Gaya saya ita Seediq di mesa, kika mprengo ku tikuh Gaya miyan msterung hini saya, uxe mu gnklaan naq yaku ka Gaya nii, tnugsaan ku na drudan alang.

Tgkingal; ini ba psterung mnsdadan, pgyaun riyung ka msterung tndadan. So laqi na laqi mtswai ka tama bubu peni, ani betaq tg5 pnsltudan lqlaqi na laqi daha we ini pstrengi duri nana, klai bale ka nii mesa rudan alang. Ani dehuk saya, hmrinas 60 knkawas mu yaku di, uka qntaan mu ma, bnhangan mu mesa wada msterung ka riso weewa msdadan alang miyan. Netun msterung ka msdadan, msseeliq ma msetuq ka tndadan denu mesa ka rudan alang, paru riyung ndaan ka nii.

Tg2; asi ka smeeliq babuy ma maasu lnihu de msterung, lnihu nii pgkela tndadan nriso nweewa mpsterung. Smeeliq babuy ge asi ka gdraun, “Psdara” kesun miyan ka smeeliq babuy nii, asi bale ka psdara ka ooda Gaya miyan yami Seediq. Malux so kiya? Mesa ka rudan alang.

“Gdraun ta ka babuy de, huwa ta kesun tmberih hei babuy dungan ka dara na? nii we asi ka utux mpkela kiya” mesa. Dungus na kari nii, uxe ita mnseediq ka pndungus kesun msterung nii, pndngusan utux ka kiya mesa. Meniq ka mesa “Uka ta tbrihan hei babuy dungan ka dara babuy gndraan ta ge, ini mhemuc malix mqedil ma, malix rseno de mnsterung ka msqedil, pnskraya utux ka kiya” mesa. Psai ba qcahun namu truma ma, iya ba chngii ka Gaya ta nii mesa rudan alang.

Rudan miyan cbeyo yami Seediq we, dmoi Gaya miyan muudas bobo dheran nii, egu riyung ka Gaya nami knmalu bale nii; ga ini klai duma ka saya di. Kiya, uxe ta mklmelux meyah bobo dheran nii ka ita Seediq, nhuwa ka psstoun ta Gaya ma slutuc lqlaqi laqi ta bobo, nii si naka ta spuun lmngelung hini mesa ku ka yaka.

賽德克族非常重視族中的族規（Gaya），現今年輕族人已不知道Gaya是何物。在婚姻上，賽德克族近親不可以互相嫁娶，若近親結婚要殺豬，並分送豬肉讓親戚知道這門婚事。本族稱殺豬為psdara。男女能結為夫妻是神靈所應許。成婚的男女雙方，絕不可恣意拋棄其妻子或夫婿，那是（流出的豬血）神靈的印記。部落耆老要我們謹記在心上且不能忘記。

賽德克族的祖先，遵循Gaya生活，該如何重振Gaya，再傳承給後世子孫，是我們要共同思考與面對的課題。