朗聲四起

lro molegelege ta mwa lika’e idra kadro ta tawaneta idra daedae, kwadra lro wata kiraceve ’adolota idra yataka lrawli, idra lro maka ’iyalre si kota ka kacalisiya si ’Aairang lro ’adoko sa lrawli, ka maka kaelra ta ki’Airang lro ’adolo sa lrawli lrini, berathe lramai kwadra maka elraelra kwa dra lra iro’a kwadra lramanema nelrini katelege oodo, si kota ka kacalisiya lro ’adolo ta sa lrawli kadro thaino, lra kalriya’ai ta dwavace sanaikai ka bera the si timo hoanahoy ka asa twa’oza, asilro yata kai legelege maro ping siyang nga ki kacalisiya asilroiyata makala ka mane manenga, lrakai katha thiboro lro a’ikane sa bolrabolrai odravalro kai ilroko sa tokolo amala, idra lrobo idra drari si ala tholrici, si ala cwalisi si ara kai tokolo sa azaz am sa golragolray lra ikai ka bolrabolray lra ikai ka airo’a, lro mobolra ne  ta lrakai ta kidrolo oodo sa makala sa lramanema.

lro tawata idra daedae si kaita hinga lre ana ki tamiya ki daedae, lro atengatengabe akalrisiya si kaita maka lrolrodo, lra celreta sa ata kalralreketa neta lrolrodo, lro kaita ’iyainiya katai sara tarolro idra na wa taiya neta, ai kisakale’eng ta ki lra wlita inilinga lro wata ki babelreng lro maka tokodralri, ikailro kainganai kadra leme dreme si lro kaita thngalri ki tamiya ki legelege, ’akaseta idre nger kata thagithagilri, lra silra’eta sa ngato si twa’oy lro lrea lra davaceta thwagilri, silro ango legelege ta ka mathariri kadro mawbolro si kadrwa ka lralraceng kadrwa ka acilray, lro kakazame ta kwadra na aga lro iyata, si kadrwa ka acilrai wa silra’eta sa tilriva si ala thiyabe si ’ataba malralrekete ta, ikai ka awngolra si aga kwadra wa silra’eta sa denge, lro kadraw kwadra denge malralrekete ta ongolro si aga, kwadra kiya lralra lalra ta idra takorawro idra avagavaga, lrawata dongodong ya kai, lro kai adenge yakai ka acilray. si kota ka kacalisiya lro ango lalegelege ta ka makala, ka akanekanea kai talenge tamaring oni’i iykaiyana katay mobay si si amaninga kai lra vavalrake nga, ka dro mwa obobo lra lra kai thinga lre ki lralraceng, idra droma idra aka nekanea lro mo legelege ai moba ysi, lramani kai ’elraelraela ta odrava kai droma yakai kai tara mobobo lra, kiraceve tokolo kadro kiya thathenge thengeta naw thingalri ki lralra ceng, ki lranagane ki lrangata miya twaeea idra silrasilra’elrini idra alane lrini.

si kaiyasa kota ka kacalisiya ki daedaeta ta mani ka amala sicenge ceng miyamiya, lrakai thingalre ki lra nagana ki lra daedae lramani kai tamalro kaiyaiya, si kaiyasa kai wa thingalre ki kai kadrwaka ta’iyanga.