朗聲四起

samaljitjen tua ca’uan niamadju a mareka tia vuvu! a tja pacucunan a sipaljizaljizav tjanuitjen avanecua yenmingtai a “vuvu ni henhuy” aya! aicua ti sakinu ljemaluay a sitjaucikelan maca’u aravac a pacacusu kata patide’ a ljemikayan, pay aza sitjaucikelan padjalimitjen a ljemizav! tiamadju savid a mamaca’uan pususu pulima, nakisusu ta kemasimilingan, sika sipalizalizav a namatjatjuca’ua’uan a inalang a nanemanga a tjaramacidjicidjiljan.

sa pacuni aicua ’uljicaca a kasiv, ridraridren a ki’apulu satju’tju’en aza ’aljic a patjatjuvadayin, nu makarasudj taza ’aljic makayanga galjuin a saneitungen sanetjalupunen! saza maneleklek, kizakilj sa suasavi sa tjuljitjen a semubaljic, celjisin sa rasin, nu metadanga calisen sa’udaten a kemuljay, nu mecalisanga ki tjeme’ic a sanesikawin kata tjemenun a maneitung.

azua kingat patje semanesekam, semalji(zemalji) aya tiavuvu. nu kingat a patagilj sem’as ta ’apulu a paljeasav, drasin a papetadanan, sa kematjekatj sa venulitjuku sa drasi uta, numacayanga vana semaljuv. saljuven nuaya suvengetjen a linitjuku, saseveci a ljemita a lemadru’. nu mazululjanga saka pucuganga kipatagilj a cemepu a semanesekam.

a tjaivililj semane lalang tua nitjen a kinacalisianan, izua tjinenunan, pinadjekecan, vinecikan, pinuluvucan, maretimaljimalji a sikasengesengan. azua “keljep”, nasacemel a’aljic a kinasengeseng, kata “baliuljan” uta, sizi takec a sinubaljican kata sinu’uvaljan. makaya sanetjalupunen kata ljavac a papu’ungcuin nia vuvu a sicuayan. ljakua luaanga mapacun a sacemel, saka sika’iljianga nasihu a ’emaljup, mavekeljanga maca’u uta. azua puvililjanga patjara sitjepanan a saliman, “dremapulj” nuaya, numakatju’tju’ ta drapulj, siberber a pasapanain, lemingac ta ci’av sa makayanga tja lapin. “veneljeng” nuaya, sialap ta ’aciljay saveljengi a kiluvad ta pakazuanan na zaljum, nu katiatiav madjuluanga lapen. aza “ ’emili” nuaya, sialap ta nakezeng a dricing, sa pasatjaladji a semapsap ta maka’aciljay a lala, aza ’uzang aza ci’av madjulu a ljedjalad ta kuni! kumalji a tjulja a tjalja’alam’aman a’erir pazangal a malavut uta.

aicua ku ljinizavan a mavid a ca’uan puvarungan nua tia vuvu, tja pasusuay a patudur, ulja kamayamayan a ikaurima’ulip a tjasikudakudan!

原民台的節目「vuvu你很會」在介紹製作苧麻線的過程、月桃蓆編織，並介紹排灣族的服飾製作分別有「夾織法tinenunan」、「貼布法pinadjekecan」、「珠繡法pinuluvucan」、「刺繡法vinecikan」、「獸皮背心keljep」等。但是這些早先族人的技術已乏人問津，何況政府早已禁止捕獵保育動物。接下來是捕撈的各種方法，有「植物毒藤麻醉dremapulj」、「圍堵支流veneljeng」、「撐開石縫’emili」等。

觀賞這些有意義的播放的節目，都是老人家們的傳統智慧，希望大家重視並傳承祖先傳下來的生活文化啊！