朗聲四起

kadu ta i dekalr mu, nu ulra a cau duwa veraya kantu isalem na kulakulang diya di, na vuwa’, na akanen diya di, nu kitulud da tigami kana yubing i nani mu, adikaadi marengay da “lrayuwan semangalan” kema.

inta na cau kadu ta i punapunan, mianger ta da sasungalan data iyavaaw.

tu ta vaawaw paka’idang ta ma’idangan, manueman lra atu inlranangan atu ulepan, kemay kanta kinamakitengan diya.

maulep muvares venaaw kanta temama, nanta taian mu, pailran diya kantu lralrak di, adi madiyaadi tu mavangavangan palru a pare’aremeng di a pare’uninan.

nu dalikedik ta kinamakitengan diya mu, mau nantu kinasemangalan nanta ma’idangan.

nanta ma’idangan mu, adi mapapalak mena’ u kanta, nantu saharan kanta da anger mu, kamawan da lrevek tu ikasavakan di, kamawan da henan tu ikaacasan.

kemay kana yociyēng, palru kana kuwocung, kanini na pida ’amiyan mu, kaduwan lra na sinsi na pangecengec panadam kanta. tu kiresanay ta kanantu kaalrakan panadam pailran.

palru harem kana kare’idang ta lra piniangaran di, puresayhu ta lra mianger mu, sasungal ta kanani na sinsi diya, sasungal ta kanantu ipanadam kanta di kanantu ipailran kanta, kanini na pida ’amiyan.

salaw ku misemangalan kana kaadu ta kanini na kanatal a! adi ta mianger da kauniyan ta da aekanen di, adi ta mianger da kauniyan ta da pikakavangan.

marayas marengay temuru na ma’idangan kanta da “nu cau ta mu, nu uniyan ta da semangalan kana cau diya mu, na cau lra, kuwaadu mudawilr kanta, ka’inava nu kemadu diyamaw” kema.

semalra miangera ta da semangalan da cau diya, nu pacepa ta kana pulralrang kanta na cau mu, payas ta semungal di, semungala ta kanadu na adi kinadalraman datu pinicauwan na pulaliuvun kanta kanani na pida ’amiyan.

在部落每當有人親自送來有機的蔬果或是收到郵件，媽媽總會說「感恩！」父母親把我們撫養到大，不知道吃了多少苦，父親要辛苦工作賺錢養我們，媽媽在我們小的時候把屎把尿的，為了照顧我們，一天到晚忙不停。只要我們健康快樂，父母就感到欣慰。父母無怨無悔的關心我們、為我們付出，父母親的恩情比海深，比山還高。

長輩常說：缺乏感恩的心，會被人家疏遠、瞧不起，如此生活會過得好嗎？所以，一旦受人協助時，大家要抱有感恩之心。