朗聲四起

ini na mangayangayaw mu, mau nantu kakuwayanan nu adi diya kituvangesar na lralrakan na cakuvakuvan, pungaway diya kana parelrimalrimaw datu ’uringecan di tu kerevatan mucalun maya’ da ungay na Pinuyumayan.

kana ’ami diya nu adalrep lra kana ’amiyan mu, na vangesaran diya mu, miinada kana valisen di na cakuvan muhenan pureha lra menadanadam kana dadawayan di na inuwavaawan na eman diya.

kanidu na duwa wariyan di na sa’esungan i henan mu, menadanadam kana papeciran di na dadawayan kana pana’ di mau nu ’aremeng tu tarekaukaudaw na vangesaran, patatalram datu ’uringecan.

pulaludus lra kana wari mu, tu pa’ari’ariyaw da papana’an, piya penapana’ mu, menadanadam diya kanantu senay na mangayangayaw a remeca’a datu tinavawan na ungay kema tu pauwayan.

piya lra kana penapana’ mu, kemay kadu kana papana’an marepakuwa pavekas mukuwa i palakuwan, nu pavavekas i makadadalan mu, nantu ma’idangan nadu na lralrak ’umuy’uy pataptap da pukedang kanadu, salaw kasahasahar.

puludus lra mu, maruwa lra kipukpuk kanantu tedek kana kituvangesar lra. ini na mangayangayaw kani i dekalr mu, mau tu i pungaway kana ’ami na kapalisiyan diya, nu piya diya mangayangayaw mu, mareturus lra na kapalisiyan diya ta ’amiyan.

nu pacepa da kapalalisiyan kanta i dekalr mu, adi kauniyan na valisen duwa kurelranga kipakarun. nu kadu kana palakuwan i sulrasulray milran mu, adi pumaya da aretidan, mawmau tu pinituvilran di maruwaru, marevulavulas mi’ilrus matikedir, palru kana puludus ta ’amiyan diya.

少年祭是卑南族少年進入成年前的訓練，藉著刺猴儀式，來培養膽識和英勇。兩天一夜的訓練，有放捕獸夾、有自製弓箭，還有夜間試膽的活動，最後才有射假猴，刺殺假猴之後，由青年帶領少年們唱祭猴歌，以弔猴靈。

少年祭是部落年祭的首項祭儀，接著所有祭典才正式展開。每項祭典，少不了少年級的成員，年祭期間須隨時待命，不論天氣多冷，他們光著上身，下半身只圍著一片藍裙，手持自製長矛，在青年會所門口輪流站崗守衛，直到年祭結束為止。