朗聲四起

ini na mangayangayaw mu, mau nantu kakuwayanan nu adi diya kituvangesar na lralrakan na cakuvakuvan, pungaway diya kana parelrimalrimaw datu ’uringecan di tu kerevatan mucalun maya’ da ungay na Pinuyumayan.

kana ’ami diya nu adalrep lra kana ’amiyan mu, na vangesaran miinada kana valisen di na cakuvan muhenan pureha lra menadanadam kana dadawayan di na inuwavaawan diya.

kanidu na duwa wariyan di sa’esungan i henan mu, menadanadam kana papeciran di na dadawayan kana pana’, di mau nu ’aremeng tu tarekaukaudaw na vangesaran, patatalram datu ’uringecan.

pulaludus lra kana wari mu, tu pa’ari’ariyaw da papana’an, piya penapana’ mu, menadanadam diya kanantu senay na mangayangayaw a remeca’a datu tinavawan na ungay kema tu pauwayan.

piya lra kana penapana’ mu, kemay kadu kana papana’an marepakuwa pavekas mukuwa i palakuwan, nu pavavekas i makadadalan mu, nantu ma’idangan nadu na lralrak ’umuy’uy pataptap da pukedang kanadu, salaw kasahasahar.

puludus lra mu, maruwa lra kipukpuk kanantu tedek kana kituvangesar lra. ini na mangayangayaw kani i dekalr mu, mau tu i pungaway kana ’ami na kapalisiyan diya, nu piya diya mangayangayaw mu, mareturus lra na kapalisiyan diya ta ’amiyan.

nu pacepa da kapalalisiyan kanta i dekalr mu, adi kauniyan na valisen duwa kurelranga kipakarun. nu kadu kana palakuwan i sulrasulray milran mu, adi pumaya da aretidan, mawmau tu pinituvilran di maruwaru, marevulavulas mi’ilrus matikedir, palru kana puludus ta ’amiyan.

少年祭是卑南族少年進入成年之前的訓練，藉著刺猴活動與儀式，來培養少年的膽識和英勇。

每年12月中旬，青年會帶領青少年上山開始練習各種工藝及生活技能。

在兩天一夜的訓練當中，有放捕獸夾的訓練，有自製弓箭的課程，還有夜間試膽的活動，最後一天才有射假猴比賽，刺殺假猴之後，由青年帶領少年們唱祭猴歌，以弔猴靈，比賽完，才能由營地賽跑至會所廣場，在跑步的路程，有許多家長隨同歡呼鼓勵，在會所大門口，會有婦女帶領練習迎接的小女生，讓到達的青少年一一戴上花環，在陪同青少年在廣場跳傳統舞，吃一頓婦女們準備的佳肴，祭典最後，青少年階級們以竹子鞭打少年屁股，代表少年的成長。這時才終告完成少年祭的活動。