朗聲四起

Yo cecay a kanga’a:yan a romi’ad no kacanglahan, hakelongen ni mama^ ato ina^ kako ato safa^ ako to fafahian a tayra i pisalamaan. Tahira kami itira i ’aloman ko tamdaw itara a misalama to tasalamaan nangra.

O roma^ a tamdaw i misalama to koliciw a mitaliyok to undofa^ a malalifet a matatoor, tadakahemekan ko nika lalifet nangra a pakakoliciw. Kako tono mako i, mifolod kako to misalamaay to fasiyaw a sa’opo^, nawhani, maolah kako a misalama to fasiyaw, onini a sa’opo^ i tada’a:loman ko tamdaw, alamitatoy cangra to nisanga’an no niyah a fasiyaw anoca o ni’acaan a fasiyaw. Fangcal cahdal ko romi’ad, tata’ang ko fali^, o kanga’a:yan a misalama to fasiyaw.

Nengneng han ako kono tao a fasiyaw i, ira ko kahirahi:ra, o futingay, o ’ayamay, o rarokohay, o rarikahay…… ka’inalan, wung……wung sanay a masoni a maefer. Tata’ang ko fali^ i takaraw ko nika fer, matifac ko cahid tookan no mata^ ko nika takaraw a nengnengan.

Harateng sa kako, ano kako koya maferay a fasiyaw i kakarayan, masamaanay hakini? Saan ko mola’ay a harateng ako. Ano mahaen o fasiyaw a maferay i kakarayan ko ’orip i, wamara:ay ko pinengneng, dadahal ko manengnengay a kalodemak.

Ano alaen ita a malatinako i ’orip ita ko pisalama to fasiyaw i, o tadanga’ayay a sapikitemel to wawa ato tamdamdaw konini a tinako. Ano sakitini i micodaday a wawa konini a tinako i, samatiyaen o takaraw no nikafer no fasiyaw ko faloco’ a malalok a micodad, nawhani, o nipicodad ita anini i, o sakanga’ayaw no ’orip ano’ayaw, orasaka, sa’icelen a micodad.

Ano sakitini i kalotamdaw konini a tinako to fasiyaw i, o nga’ayay a sakalatamdaw no mita, nawhani, o ’orip no mita itini tona haekal i mato o fasiyaw a micongangah to fali^ a mafer, caay karahoday ko nika’orip. Nikawrira, o fasiyaw tono fasiyaw i congangahen niira ko fali^ a maefer, ano tata’ang ko fali^ matongal ko nikatakaraw no nika^efer, malecad tonini i ’orip ita ano adihay ko malitemohay a salifet anoca kapadesan a demak i, o nga’ayay konini, o pakacipocay to ’orip han ita a milayap.

我跟著父母、弟妹到休閒活動地，到達時已人滿為患。有些人騎著腳踏車，而我參加玩風箏，參加的人很多，各自攜帶自製或買來的風箏。風箏有不同的造型，風吹得越強風箏飛得越高，嗡嗡作響。

風箏倘若是我的話，會如何呢？如果生命如同風箏飛上天空，可能對每件事情看的遠，看的廣。對學生而言，要如風箏一樣飛得很高，為了將來更好，所以要努力讀書。風箏逆風可以飛向天空，風吹得越強，也飛得越高，如若生活的考驗對我們有益。