朗聲四起

Paah seuxal bitaq sayang jiyun bi Truku ka ramil gumu. Sduuy dha muda mnmanu hug? Tgkingal o musa miying pngusul. Tai qixan ka rbagan siida, ana mgrbu ana gbiyan hbaraw balay sjiqun powsa ramil gumu ni miying tmuri. Yaasa mhuriq ka sspriq ni ddxgal, ida ramil gumu ka mllngug bi. Ana ya hnriqan ka qaqay o aji mhuya. Pusu balay o aji ta na btaqun rqci ni hbagun bhngil. Aji ta peangal ramus. Msleexan bi mrmux kska bbuyu.

Tgdha do kika musa dgiyaq. Mneglngug bi kksa dgiyaq ka hiya. Tmabuy ni steetu o hiya ka stmaun ta balay. Ana ya mhuriq saw tujiq ka dxgal o aji ta sdhriq ni ptakur. Yaasa mkdhug bi qlqahan ka hiya. Mtgamil ni lhkah bi uri. Rmnngaw ta tama mu, “Qulung musa bbuyu ida psai bi.”

Sayang o kla niqan bgurah sduuy dha. Kika sun smluhay pstalang buji. Yaasa dseejiq pstalang buji o smulu bi smluhay kdjiyax. Ana kingal jiyax ini dha srhqani. Saw ka mdrumut bi seejiq o ana qmuyux ana sbgihur ida ga pstalang. Ini saw kiya do mrkrak ka baga da msa. Ana nii knskiyan ka karat,  tmusung hmbuy ka quyux o ida powsa ramil gumu ni tmbuji. Kika sun pskingal bi lnglungan gmquirng bjian ksun.

Rahuq na duri o sduuy dha miying btunux embanah siida. Yaasa psqaqay ta mkksa babaw qhqahur o mnarux bi. Nasi rbagan do nii kntlxan ungat qlqahan. Kibi saw sqmaun sayang balay ka dpdapil. Duma na qahur o mhungul ni hmibaw qaqay duri. Nasi mangal ramus do ungat lnglungan miying btunux kida. Mksa ta babaw tasil siyaw yayung ni gsilung o ida ramil gumu ka psaun. Kisa aji sdhriq trbuq ni qluli kska yyyayung.  

Lala klgan ka ramil gumu. Niqan hlpis ni kndux. Niqan llbu ni bbaraw. Lala bi klgan ka lhang dha uri. Niqan mgpajiq, mqalux, embanah, ni mgsudung. Rnsuhan dha suyang bi pnskraya duri. Mgmeenu ka kuxul su o geegi nanak. Ida mkray hari brigan o kika qbsiyaq hari jiyun.

Kmlaanay ta balay ka qaqay han kika tduwa mnduwa ta bi qmeepah. Kika bbaraw ksaan ta elug uri. Qmeepah ta uri o ida qaya ka pusu balay. Mnarux ni mangal luqih ka qaya do ini ta kmmuda ana manu uri da. Ida qbubur ka pusu bi, rahuq na do psaun ta bukuy hari kida.

雨鞋是最實用的器具。第一，用於尋找蝸牛時，穿雨鞋最恰當，不致尖物所刺及芒草所割、輕易穿梭樹叢。第二便是打獵時，無論爬坡或下坡，行走於潮濕的泥土上不會滑倒，紮實且輕便，練箭的人一心只想日日練箭，無論天冷雨下，仍舊穿著雨鞋練箭。另外是尋找玫瑰石，踩在石頭及沙土上會痛會燙，穿雨鞋防尖石刺傷及防滑。

雨鞋樣式多，選你所愛。腳部一定要保護好，才能好好做事。身體重於一切，身體保護好，才能做事持久。