朗聲四起

Towkan o snluan nuqih. Nuqih o paah nhuma ta krig. Djiyun ta musa bbuyu ka nii. Psaan ta dha wahug ka hrhirang. Duri ni tqrian ta kska lubuy ka qngqaya ni smsamat seapa ta towkan. Mnmanu blbilaq qngqaya o niqan towkan do suyang bi paan da. Ddsnaw Truku o asi ka niqan towkan na msa.

Ini mu shngii ka laqi ku sbiyaw. Tneguhuy ku tama mu musa tmsamat. Sbgay ku na kingal towkan uri. Slbuun ka dha wahug do asi bi seedal bukuy mu da. Tmabuy ni steetu o asi tqapah knan malu bi ksaan. Ana ya aji bgurah. Ruan lala balay drdara samat uri. Gmaxan ana manu knux. Tayal kdhug paan kida. Kibi saw maa kingal hiyi qbubur mu ka hiya da.

Maxal rima jiyax asi seedal knan ka towkan nii. Mrana nngalan ka smsamat do mrana hnjilan ka napa uri. Ida rmdu msangay ka tgaun mu bi, lhlahan mu ka hrhirang o asi sa “wax”! Kibi empskaya da. Yaasa mgsmay ta bi ka mkksa ddgiyaq. Tai mshrus bi ka dowras do asi ta ka mkkarang duma. Ixun ta eaji takur. Mring ta uri o mdka qsiya hmbuy mtucing mkeleelug. Mdka quyux wada srsan han ni nii duri. Ya ta empdhuq knuwan o ini ta lnglungi ka malu. Mdka kuluk knhuway knhuway thmuku steetu. Asi ta phngi ka llnglung.

Ana bitaq sayang ini mu bi shngii ka snttuan mu ddgiyaq. Ida mniq lnglungan mu ka towkan nii uri. Pseupu nami mkrbuk bi mksa hunat ni kuung ddgiyaq.

Jiyax sayang do niqan bgurah sduuy dha ka towkan da. Sduuy dha hmaqul btunux. Saw nii seejiq o empgiying btunux ksun. Yaasa thjil bi paan ka btunux nii ssalu dha kndux qcinuh saw hirang knlabang ni bitaq hwinuk knbaraw. Kika aji pknarux bukuy. Mrana knpraan ka btunux o mrana ka pila ssbarig dha uri. Tai mqsuqi bi hnjilan dga asi plawa tdruy kida. Hqulun dha ni dsun dha sapah. Smluun ni dgdun dha bitaq sriyu kana prpurah lhang.  

Ungat hari seejiq ka empsalu towkan da. Yaasa msqriqu bi snluun ka hiya. Wana rdrudan ka mkla smalu uri. Ungat rmun dha smluhay ka embbarah mnsa. Ungat hari seejiq mhuma krig uri da. Ini hari qtai sayang ka towkan da. Naa ta slhayun balay ni empeeniq ana bitaq knuwan.

背網袋苧麻製成，用於高山打獵。太魯閣族的男人都有自己的背袋。爸爸給我的背袋是舊的且沾滿獸血，但格外紮實。十五天的獵期，獸肉越多就越重，路途中總期待下一次的休息。現今已有新用途，用於背運玫瑰石，越重錢越多。若太大，喚來卡車，運回家中。

編製苧麻背袋的人已近失傳。製作太繁瑣。種的人也少。不多見了。這樣的智慧應該不能遺失。需好好學習不可中斷。願永遠傳續。