朗聲四起

Minihan cak huli’ masnava’ malasbunun, petataqu cam mi Biung tu, namakahan cak Hungku tantungu maca sanavanin.

Minihan cak huli’ ta, namunhan Tamazu’an, qani’anang nga napanhan cak Hongku kilim Biung pababazbaz. makatain cak makahan Paqut, masopa Malavi’. matu kahanin cak Hongku’ ta’ a tasban cak, opa madia’ ita a bunun.

Minsanavanin na tudipin cak, kalingva’ tu na masopin ta. talmadin ni tu pabazbaz Biung , madia’ nam ma ispalaqanciap, minihan uva’azang sohan inhan Tiaciu’ ta kukuza tu lininqeban, uka’ i ni tu ispababaz. miliskin ni liniqeban, mastan na ineqdi’an han iniqumican solopa ku, qala muaz cam kalatnipun maqasmav kukuza sepu ki lumaq.

Matu vakai’ang cam ma, ihan cam Taiciu’ ma’ungting ngi lehlehdaing, macia Biung nga kukuza’un na, aculi’ cin babalivan iskan, solopaku daukang nga Biung ihan Taiciu’ babalivan iskan. hezin cak punmac’an qan hima qamisan musoqes han acang ti kukuza ki sinpala’ madadengaz tu quma. cia Buingun na mungaus munhan Taiciu’ kukuza, kinuzin cak, matu lopang cak munhan Taiciu’ kukuza ka, cia Biungun na sisdangun zaku, ni tu maqtu sipungulun, tu sinkadedaz. solopaku ka Biungun mindadangaz bunun maca heza’ cia bunun na ineqdi’an. pindadangaz cam mi Biungun, qala ciatun na mastan na sinkadangaz zaku, ciatun amin na macial la iniqumican lopaku. toqumicun ni tamadiqanin opa macial malka cia ki tec’an cin bunun.

Matu kahanin cak lumaq qi Biung han Hongku’ a, nanunin naip ihan hilav mantatala zaku madas pulumaq mal’u, i’ita cam dusa pababazbaz zi liniqeman tu vakai’ang han Taiciu’ tu iniqumican. minuc’anang cak kilim mi kukuza’un na, hazun cak ki laupan macingav tu bunun asu, tupa’un zaku tu “u”, usun cak laupan tupa tu, “ina’in asu mudan mantatala lingav”, niaunin cak cingavan duma tu qalinga. taqu qa Biung tu mopata amin tu lopang babalivan iskan na, heza’ a samatola’ sadu. qala solopaku tumacqengun ni uskunan nai ita babalivan iskan, opa kanmamatuk maqasmav kukuza.

Matu mudanin cak ka, matesqang nga buan madaing sala!