朗聲四起

Kingal hngkwasan o ida niqan kingal ka jiyax, miyah mssli alang dgiyaq kana ka gaga mniq eseisil alang na seejiq. Jiyax nii ga kiya ka smiyan smsung ntnpusu seejiq kngkingal hangkawas “jiyax 1 idas 1” wah!

Smiyan smsung “jiyax 1 idas 1” nii o ida hmnici knlwaan Tanah Tunux siida ka nii, ida uxay gaya rudan sbiyaw. Tnurug Tanah Tunux ka saw uda nii. Ana nanaq sayang do wada ta luhay saw kiya muda uri da. Hici bi keeman jiyax kingal hngkawas o mseupu mqaras hmaduc endaan knmalu hngkawas han, mgrbu saman do mseupu smqaras smiyah bgurah hngkawas ka tnealang ni sapah pyasan. Kana ka seejiq tnealang ni nadas dha dangi o mqaras miyah teumal smiyan smsung, seejiq tnealang ga smruwa psumu pila sbarig qyqaya snadu, mqaras smeiyah bgurah hngkawas.

Keeman siida mnhdu mkan nhapuy do miyah mssli pslian qqrasun ka seejiq alang. Duma dha o miyah teumal mgrig, duma dha o miyah teumal meuyas uyas, duma dha o miyah dmhaw nanaq. Kana ka laqi meuyas o dsan emptgsa pgrig ni peuyas uyas ni plubu uri, ida malu balay qtaan, malu balay qbhangun uri, kiya ni mqaras bi qmita snlhayan lqlaqi ka rdrudan alang. Duri ni kska na hiya o gmimax “ kata ima ka malu bi utux ” seejiq, pskluuy mangal paru snadu qyqaya wah! Snadu o niqan tribi, ddeynsya, kulu huda…dnii ka pnsramal qyqaya snada, Ida dha staga balay ka uda nii. Dhuq ska rabi do, mutung bnarig peyn-paw skrdaxan dha ka babwa karac, tay saw musa mrdax ka uda alang hici. Ida saw nii ka keeman pqangaw rabi smiyah bgurah hngkawas ka alang dgiyaq ksun.

Mgrbu saman do miyah mssli sapah pyasan kana ka seejiq tnealang, psramal pspung tmalang, seangal dha snadu qyqaya. Jiyax nii kiya ka smiyan smsung bgurah hngkawas ksun, kana ka ssiyaw sapah pyasan o niqan bbrigan uqun, qyqaya djiyun sapah ni hrpasan lqian. Jiyax nii hbaraw bi ka qbsuran pnaah isil alang miyah sapah pyasan, miyah dmurul utux baraw ni utux drudan. Tay saw musa kmdudul malu ka kndusan lqlaqi ni emptgsa, tay saw musa malu utux ni mkala knmalu ka sapah pyasan.

Ana laqi biciq ana rudan, ida miyah mssli tlaman sapah pyasan kana, saw bi kingal paru tnsapah mqaras seupu rmgrig, pspung tmalang, tuhuy hmrapas lqian, hici do mqaras mangal qyqaya snadu, saw ka cimu, abura, sksik, tleengan… dnii, yasa tduwa djiyun ruwan sapah kana ka qyqaya nii.

 

 

「一月一日」是原住民的過年！過年的前一晚，部落與學校會一起歡送舊年。晚上，族人前往活動會場，參與舞蹈表演、合唱或湊熱鬧，也會安排抽獎活動！不回家的人，會等到半夜點上鞭炮。

過年清晨，部落的人會在學校賽跑。學校湧進攤販，如：小吃、家用品到小孩玩具。從幼童到耆老，聚集在學校的操場跳舞、唱歌、賽跑、玩趣味遊戲，結束時領取獎品，如：鹽巴、沙拉油、掃把、椅子等生活用品。山上的過年就是這樣吸引部落族人的心。