朗聲四起

pitasaw qupaskua na busus, yau uzusa palilin na kebalan. saqaussiq nani palilin na kebalan, qanengi melabu ’daq, saqazusa nani palilin na tuRbuwan, pelisin paqayta palabu tu ’daq, zana saleppawan ay seppawan zau, melilin nani manmet saqabian saleppawan. saqaussiq palilinan na kebalan nani ta tuRantuRabi melilin, maynep ita tu kikiya, masuwat ti ita ta kezanan melilin, mai pama temuku kikang taquq melilin, pasaya ita tu tebaRi ay seRay busaR ay Raq, utulu tenayan ay awa, uzusa nani sasepawan tu niseppawan tebaRi ay seRay busaR ay Raq, ussiq awa nani zata seppaw ay lazat, datebus ay kukuy kintani lazat kilasan ta tu utani. Raya ay tasaw na pinileppaw mazas siangatu, sikawma temunuR tu baqbaqibai seppaw tu busaR ay seRay tebaRi ay Raq, nizu siqatulu seppaw, izawan ta tu kiya ta awan sasilepan ta, kukuy nansakilasan kenitan ta siqatulu seppaw qaya, izawan tu kitut saqanan ta, muman kulikuzan na ti saleppawan paqeqenanem seppaw.

saqazusa nani palilin na tuRbuan, mulepun tu tuRantuRabi ay melilin deddan ’nay, taRbabi ta Rabetin dukian nengi ti siangatu melilin tu tuRbuwan, melilin tu tuRbuwan muwaza pelisin na, sukaw paqayta palabu tu ’daq. azu mai qinunungan ta pelisin zau, qasilanas ya saleppawan. melilin tu tuRbuwan nani yau ta temunawan, pasaya ita tu ussiq benuqu, sapaR mamitulun uzusa, biRi na benina uzusa, sapsapan ta ta babaw na sapaR, seppawan ta ta benuquan, temuku ti ay kikang taquq, tebaRi ay seRay busaR ay Raq, kikang taquq nani qatuRiyasan ta temmaq banus na, taktakan ta ’si na kikang taquq Ramaz ta tu salang, mammi ti nani alan ta penazengitan na, anem na, tupi na sapalilinan, kintani lazat melilin kilasan ta tu utani, senapuwaR saqepeR paqenanem, datebus ay kukuy sakilasan paqenanem, seppaw nani seppawan ta ta biRian na benina, sasetaR munna Raya ay tasaw na pinileppaw mazas siangatu seppaw, sikawman temunuR tu baqbaqibai, nizu siqatulu seppaw qaya, kulikuzan na ti na saleppawan seppaw, nizu siqatulu seppaw, qatis seppaw ta liman qanan ta.

每年農曆年前，噶瑪蘭族有二種祭祖儀式。一種kenalan儀式。第二種是TuRbuwan儀式。kenalan在凌晨雞啼前舉行，外人可以參加，地點是爐灶上。祭品有年糕、紅白酒各一份。由家中最年長者帶領祭祖。TuRbuwan當天上午舉行。禁忌很多，不能讓外人觀看。在客廳舉行，殺一隻會啼的公雞，祭品是煮熟的雞胗、雞肝、雞心及糯米飯糰、年糕、紅白酒全各一份，由家中最年長者主持。今天的齋飯是雞湯和糯米，有剩餘不能隔夜，也不能給家禽吃，要丟到河口順水流到海邊。