朗聲四起

ini na talingilr tu kapauwayan di kanantu dadawayan mu, mau nu kapalisiyan ta i dekalr, ta kinaka’idang da kiyakarunan, nu patikedir ta da talingilr mu, ulra tu pinipauwayan, mau inta di na Katratripulr na mikakuwayanan da patikedir kanini na talingilr.

marengay na ma’idangan mu, alra adiyu diya maruwadi ta temuwamuwan diya kana Katratripulr kema. inta mu, mau na marema’idang na vavayan, i Tuku tu ngadan, na Katratripulr mu, mau na ma’inay, i Sihasihaw tu ngadan kema.

kana maruwaday lra kantu kinekaduwan nadu na maruwadi mu, karemidekalr lra, mumalr kantu tumuwamuwan da patikedir i rukup kana acas tu talingilr, maruwaya pakadalram kantu pecis da kapalisiyan lra, di semasahar mi lra, kinuwa pakadalram tu pauwayan kema na dawdawan.

kanta i Kasavakan nu kemaderunan mu, patikedir ta kana tinuma’inay na talingilr. nu pulaludus lra na vuceriyan mu, patikedir ta kana tinuvavayan na talingilr.

demaway diya i dadare’ kanidu na cinaucau na talingilr, piya lra mu, marepulralrang mapiya na ma’inayan, ulra na semasukun, ulra na kemakedeng, mukuwa lra patikedira kanidu na talingilr mu, aciyu lra i rukurukup, nu mena’u ta kana pinatikedir lra i icas na talingilr mu, adi ta diya karuwa mudalrep na vavayan kema, mau na pakadalram kanta da ulra diya na marapadangal na patikediran a tikelruwan kema tu pauwayan.

semalra mangara ta diya kana piya lra patikedir kana tikelruwan tu kawayan di piya lra pacungulr kana ca’apan mu, tatena’ lra puludus kikarun na ma’inayan kema, di karuwa lra musavak na vavayan kema na kakuwayanan.

立精神標誌的意義與製作是每年部落祭典的大事，也有它特別的意義，因知本部落與建和部落為姊弟關係，每逢祭典都會各自立起此部落精神標誌，為告知姊弟活動開始之意。在我們建和部落到了仲夏的祭儀，就會立起男士精神標誌，到了冬末年祭，便會立起女士的精神標誌。他們會先在地面上將人形製作完成後，再同心協力將它立起，當部落精神標誌高高聳立時，會將精神標誌面向弟弟部落，也是告知族人我們將進入第二階段開始「立鞦韆」之義。