朗聲四起

nu vangesaran ta lra, na mulavak i anger ta tinakesiyan i Palakuwan mu, mau idu na “ pangecengec ta kikarun kananta kiyakarunan, adi ta mudada’ulr kantu ngai da cau ” kema. madalram ta papiya kanini na pauwayan, nu ’inava lra nu kinikarunan mu, ulra diya na pasasala’ masiri, di nu kuwace lra nu kinikarunan mu, ulra diya na paka’inava kanu kema na ngai.

semalra ta takesiyaw ta dadek di miturus ta da kakuwayanan, ta pukedangay ta anger, amana muda’ulr elra kana piyamelri na ngai, munu pacepa ta da pakakuwaceng kanta  pinicauwan di piniangeran.

madalram ta da pamelri di adi ta maruwa miturus da kakuwayanan mu, likudan lra kadu ta lra ma’ulid kumudaya. di pakaaludun ta lra da ta anger.

kanini na pida ’amiyan, kemay valise palru kituvangsar ta tinakesiyan mu, sayhu ta remamed da ulepan, di mi’uringecan ta lra piniangeran, nu eman puretavarang ta diya, puravus ta diya mitulus da duma na cau.

kana inuvulukan kani Palakuwan, nu pacepa ku da kina’ulidan mu, nantu tinaturuwan na ma’idangan, kemawan kadu i calingalinga mararengay da “ ta talrimayaw data anger kikarun, ta sanininaw tu pasala’an da ngai na cau, ta pakalrawalrawayaw na semasiri na ngai ” kema.

semalra nanta temuwamuwan tu pinarevuwa’ ini na patakesiyan mu, mau lra nanta pulralrepusan, ini na pananadaman mu, melri nu kemay udung rinarengay lra da patakesiyan mu, musavak lra i anger kema, tu marangeran pukatatena’ da temakesi na lralrak mu, mikinuretan datu kakuwayanan i Palakuwan.

na mitulus kipatakesi di patedelr tu pinuangeran mu, kipulihu di muicaicas puludus tu tinakesiyan, idu na adi karuwa puludus mu, mau na tavarang kipatakesi di piyamelri tu piniangeran, tu pusavungay da adiya karuwa kipulihu kema. na maruwa kipulihu mu, mau na karuwa lra mikada i ruma’ kema tu pauwayan. 

身為青年在青年會所受教的心得是：「盡心做好自己本分事，勿讓雜音擾心亂意」。這是誰都知道的道理。離開會所的日子，每當遇到不順心的事，前輩的叮嚀便會不時地在耳邊響起：為人處事靠自己，背後批評由他去。以上是在青少年成長過程中，進入青年會所受教最大的收穫！

因此祖先的會所教育，最值得傳承的是品德教育，這並非口頭說說就能深刻記在心裡的教材，為了讓男人深刻記住，祖先早已制訂會所制度，來訓練成為部落男子漢的教育！