朗聲四起

marengay i mulri na vavayan mu, inta na Kasavakan ta uwa’umayan kana dawa mu, mau tu kiyakarunan na vavayan adiyu diya kema. ini na kiyakarunan na dawa mu, salaw kapalapalak di maulep ta milran palru kana piya ta mare’ani peniya.

piya ta lra mare’ani i ’uma kema ta mu, mavangavang ta diya kana pakakadawan, adi ta madiyadi venaliyas pakadaw di temarena’u ta diya kana wari, nu ma’udalr mu, mapec ta diya pusavak kana pacacapayan, likudan lra pinuwayan lra kana sulu. nu kapalalisiyan lra mu, semuhesuh diya da daderuwan, semalra kana kemay semasalem ta lra kana lumay harem mu, marekauniyan lra na mi’uma kana dawa kema i mulri.

ku valrayaw tu vinavati i mulri na vavayan, kana kemiramiyan kikarun kana ’a’umayan na dawa, kemay remavi diya di temehus, lrematud, palru kana mare’ani mu, mau tu kiyakarunan da vavayan peniya kema. na ma’inayan mu, micepa da ’ema’iyar i dekalr di pa’alrup padulu datu paakan da rinuma’enan.kema a adiyu diya

ini na uwa’umayan kana dawa mu, mau na Pinuyumayan diya, mikakuwayanan kanini na marepulrapulrang.

kana ’ami’ami diya mau nu kalratudan da dawa, na vavayan diya mu, murairaip lra kantu uwa’umayan, mau na kemadu na musa’ur,

mukasakasa di murekep tu piniangeran, puludus lra kantu lralratudan.

semalra na dawa kema mu, mau nanta kaakanan di mau nanta pukakedangan data dadek, maringuringuc data kavaawan, na kakuwayanan lra, na palalisiyan lra, na kairayan lra, na kapalisilisi lra mu, uniyan na adi melri muravak kana dawa.

ini na dawa tu uwa’umayan da takakesiyan mu, melri nu patiwlayan panadam pulrepus! marengay na ayawan “na ma’inayan lra di na vavayan lra mu, maruwa lra mukasa mu’uma kana dawa harem’’ kema.

在過去的族人，把小米田的農事歸給婦女負責，實在是繁瑣又辛苦。所幸現代無論是男是女都可以去小米田幫忙！收割完後，要不時的翻覆曝曬，還要注意天氣的轉變，雨天，就必須收進烘乾小米的灶子上。最後才能收進小米倉裡。因為小米而產生的文化，呈現了部落婦女許多的美德。每逢小米除草的季節，婦女便會自發性的組成換工團。種植小米之重要性，舉凡文化、祭儀、倫理、禁忌等等。是不可或缺的食物，更是需要傳承農事與知識的教育啊！