朗聲四起

Sbiyaw balay ka rudan Truku ga, mkla bi mseupu meudus hmnru bbuyu, quri qngqaya djiyun qmpah o smmalu nanak ni mttuku balay djiyun kndsan dha nanak uri. Mtbiyax balay qmpah ka rudan Truku sbiyaw, mgrbu balay do mtbiyax qmpah ni msskeeman bi hana miyah sapah paah qmpahan dha. mnhdu mtbiyax do musa maduk bbuyu ka snsnaw, kykuyuh o tminun sapah.

Emptukuy ni emphuma ana manu pnegalang brah na o asi ka plealay musa psgasut han, kiya ka mha suyang bi hru ni lala gnhiyi na msa ka rudan sbiyaw. Gaya o saw nii o msgasut alang ga, mk4 jiyax pnsrmalan ni spida hraan idas ska rabi madas ana manu ghak pnegalang, paah sapah mowsa smapuh ka msgasut, madas kingal laqi snaw tghuy hyaan musa, msgasut o rngagan na ka laqi snaw “Mowsa ta smapuh utux ka sayang da, iya bi squwaq ni gmlux balay”, babaw na nii do phngun na ka tahut ngalun na ka qbulit ni qhuni qada na ngangut ni mangal bgurah qhuni marah mtahu. Pusu na ka nii ga, qmada smudal nuda ni psbgurah euda, iyax jiyax musa smapuh o ini phngi ka tahut nii, babaw na nii ptungan na ka harung gaga jiyun laqi snaw ni hmiru harung musa spuhan, Mnhdu smapuh pnaah spuhan dhuq alang do miyah hyaan kana ka kuyuh tnealang peangal ghak nadas msgasut, yaasa klaun dha nadas msgasut ka ghak nii o suyang bi ni mrana bi gnhiyi niya.

Kmtuy o saw kiya uri, asi ka msgasut plealay musa kmtuy, kiya ka ini tmbrii ka seejiq mkan siida. Nasi aji saw kiya dga, ini kmalu hru na ni naqih pneghiyi na uri, duri o tmbriun mhuqil ka seejiq, ana qbhni saw kiya uri msa ka kari hnici rudan Truku sbiyaw.

Gaya kmtuy o saw nii, ini duwa sduuy yayu snalu xiluy, dmuuy btug snalu djima ka kmtuy masu, gaya bi ka empprngaw ni squwaq kmtuy siida.

Babaw mnhdu mtbiyax kmtuy ka dsnaw alang o tqnay musa bbuyu kana, mnsa bbuyu dhuq sapah do mseupu kana alang mqaras mkan, mimah, meuyas ni rmgrig mktru jiyax. Kiya ka kiya ni ini kndka ka knxalan ta sayang da, kng1 hngkawas10 idas 15 jiyax muda psmiyan Mgay Bari 1 jiyax.

古時生活自給自主。播種及收割前，祭司會去野外四天，準備祭神。祭神完成回到部落，部落的人分得祭司手中的種子，但祭司得先撒下種子，以表示這種子，一定長得很好，結實更多，收割時祭司得先收割，這樣吃了不會中毒，否則連鳥吃了也會中毒而死。

收穫時不能說話，且要用竹片製的刀來收割。一年有兩次的收穫期一次是在5-6月稱作「Kmtuy Basaw ni Masu」另一次是在9-10月稱作「Mhug Basaw ni Masu」。時代不同，現在每年12月15日，部落舉行三天的Mgay Bari活動。