朗聲四起

tantitini cak munhan vanglaz mudadan. macalpudengaz za is’ang milislin kaviaz nak. makuacuna minmopati’? munhan cak sila vanglaz, mal’anoqo’ han lakda’, tapboqun zaku ka bantac han makazhav danum, ni’ a is’ang misnungciv.

mulingku ka usaq pistudoqtudoq mungqanu’ ni tu qancepun tu maqeca. tungqalili han maklu’ tu danum munqanu.

Untini’an daza’ lakda mal’anoqo’ han vanglaz. macalpudengaz za is’ang milislin kaviaz. mucqa kaliluvluv makazhav luvluv, madas makazhavdengaz tu busbus qudan. samaqa’ i ludun sadu’an tu maningzav, maszang ma’u’uvaul lisav matesqang celangun. matucalpu ka is’ang natasbanin na tas’a qamisan ni. bazbaz’an zaku ka qudan tu, qudan! qudan! katu macmuav mazaq, namintunoq qa dan, na’uka’ cia kaivaz nak ka laqeban mucoqes han acang. na’uka cia kacalpun tu bunun dan laqeban mucoqes kilim zaku. na’uka cia asaun zaku mano’az tu binano’az dan laqeban, mucoqes munhan zaku’an. tasqamisan tas’a tas’a tu buan daqdaqanin mantatala cak inak tu kaviaz.

qudan! qudana! pizaqe ka qudan! pizaqe ka qudan! piluvuc dalaq nastu ti, sohan masinav inak kecalpu’an han kumbu’ita’ i is’ang. langat ti iskaucanin cak ki inak tu usaq. langat ti isvulucanin kecalpu’an. langat ti iskazhavunin qenimulmulan. telpin tu qamisan buan diqanin. inak tu kecalpu’an, qenimulmulan, elkas’angan, han kumbu’ is’ang nak piscoqazcoqaz teqevucvuc, kakalat hubung nak. kailakinang inak tu hubung inak tu is’ang. ai! na nin qana musoqes sa pekasvala’an. qudan! qudan! sinavi ka cikopa qenimulmulan cin kecalpu’an kecakbitan han kumbu’ is’ang nak.

inak pekavezan tu iniqumican mataqdung sadu’an. masengukin na lutbu, ihan kaliluvluv saququdan makazhav tu diqanin ti, untini’an cak mulongqu han vanglaz, minkelac azak daukdauk kancacaqa’ masoqbung tu caqa’, tantitinin daukdauk mudadan han ni tu masansan tu vanglaz, coqescoqes miliskin liniqeban iniqumican. ai! ni a luvluv mimisbu’ madas busbus saququdan, qenimulmulan kecalpu’an kecakbitan maldauk kumbu’ is’ang nak.

我獨自一個人往河邊去，坐到石頭上，把腳伸進河裡，思起往事淚水滾落冰冷的河水中，不知流向何處。忽然有陣冷風吹了過來，也帶寒冷的細雨，遠望山中的翠綠，彷彿春天嫩綠一般，我叫著，雨呀！別下太多，坍崩的道路，阻礙情人我期盼情人回。雨呀！把雨下大一點！煩惱痛苦流河裡，我被孤單、思念、淚淋濕。雨呀！把心清掉吧！冷風寒雨，落身軀，思起黯淡情懷，沈重腳步，驚覺！不復回！雨啊！下吧！愛情不復返。