朗聲四起

yakai ku lrulai ka sauwalai, malilisi tuhamuhu, madalame hivu ki umase, madalame kauhiva ku lremea, madalame pangicaeme kalisi ki umase, la tualrawnga. yakai la avayvai, ku tamaini labai iniya ku yalwalumasa ka sakedrekedre. lakitubi iniya myaikai, kusu ka lalakeli, sana kikelasu ku lisia si apihivu, malra ku ea ka sakedrekedre kedrekedre pikai ki balingibingi.

ki samakavale, kwani lrulai wakedrekedre ku matulrulu si pitu ku sakedrekedre pikai ki balingibingi. sa ngilribatenga ku nitahadramaha, ki vayvai ku pikaini ki balingibingi kedrekedre ka sakedrekedre, ahwa mukivalavala abekela, wathingalenga ngihahuthuku ku lisia, lapulringalringau pugathimi, lu ngihahuthuka ku lisia mapadudulru ki amalra ku sakedrekedre kedrekedre pikai ki balingibingi. laikai sa avayvai, kwani lrulai ngiathathingale, aidulrunga huthuku ku lisianeini si kai putaluvaivai, wadulrunga makakalrale kai kedrekedre ku sakedrekedre pikai ki balingibingi. la alra idra tedra ka sakedrekedre swaulri bwaai ki tamaini.

kwani tatama langibalre myaikai, twalai kayasasaa sana dulrusu ngihahuthuku ku lisianesu, sanadulrusu malra idra naiahivuanesu ki umase drepete si ahakai ku sakiyalibakesu pacepe, patwaladha ki balingibingi mutuluthu ku ea ka sakedrekedre. sangilribatenga ku nimakapiyala, kwani lrulai peaelaela ki tamaini, mwatuluthunganaku demedeme ku sakedrekedre. la iluku ki tamaini paceele.

latubalre kwani tamaini, lalakeli, matiakihagai tuhamuhu, athingala ku tasidanesu, patengatenganesu ka wadulrunga ngihahuthuku ku lisianesu, huthuku ku sahivuanesu ki umase. ceela ikay balingibingi, lulutanenga ki takikedrekedra ki sakedrekedre, dwadulanenga kadruwa ku tailrepenga ngialrau ku natangimiya.

amani ku athingalanesu, sana kalisia ngivale ki umase, sana kauhiva ku lremea si ku malisi ka vaga, ngiavalesu pakadula ki umase. ki bilrila ani tumatumanemadu nau cakupu nau drisisi miya makucingalre, kwadra takadula ai pasuhuwana ku bakici, aiamiyaiya ikai tangimiya ki balingibingi, daduladulanenga, lakuni kadruwamadu ka wacapange kalisi lrelreme ki umase.

有個脾氣很壞的小男孩，習慣罵人、講髒話。爸爸給他一袋釘子，交代他：「每想發脾氣時，就將釘子釘在籬笆。」第一天，男孩釘了三十七根釘子。幾星期後，發現控制自己脾氣，比釘釘子到籬笆更容易。最後竟能完全控制脾氣，可不再釘釘子了。爸爸又要求他：「現在開始，每當能自我控制，把罵人轉為包容，就可拔一根釘子」，最後也將釘子拔完了。父親提醒孩子：說話傷了人，猶如釘痕，事後怎麼想彌補，仍會留下疤痕。」