朗聲四起

lu tangeangeaku, madalamaku icubungu ki lingu si ngikauhivahiva, ngipapelaela ku balaili pikai ki kidremedreme, ngipapelaela ku sipisipili muhikaykaili, ngipapelaela ku kihagahagaili, ngipapelaela ku kipakwalryalrili tubitubili, madalamaku ikay ki lingu, maicubungu idra yakai ki lingu ka amaniyaku, apakimikimidri, macicava pahangithi, apaaikikiyu, myaki amani kwadra makakadalame ka lamaali lamatalragi.

lu tangeangeaku, madalamaku salikaeaea ku kidremedreme kadruwa ku wavangevange, isaseleba piya ku natwatuma iyali, anika wacicikipi wakacyacia ki senate, anika wazeazega, anika waceceele ki hungu, anika kyalalalra pasingi raziu ku senai, anika kiavaevange ku saki vaevaevanga ki tingnau, anika siavava ki tinges, anika pangwa urugange, anika--, sana ka kadalameli, sanaka thingaleli twatuma, ai dulruwaku ngisasingkai ngipapilri, si iyadringi kisupisupilri ku tataangeangeaneli.

lu tangeangeaku, madalamaku mulatadre, ngukakai ku yakai ku lrilria ka kaelrea dwadavace, kilalra lu kahahiyau ku laadhadhame, takulasease, aalalubai, siavava ceele ki alivaevaha takuaiavithi lu ngipapapalai masasawlri, papubelenge papulebe, papuvanale papuvihi. yakai lu isadra ibelenge ki bengelrai, yakai lu isadra ibelenge ki ubulu, yakai lu isadra ikay ki daedae, matidalame, mati pusamalra. siavava swasulrape ku yababiyabila ki kaelrea ka labengelrai, swabalri ku tasangulralrema, ceele ku tangimiyanelini, lu kidringadhaku ku kadalameli, yakai lu pilutaku si cingase pikai ki calringali, lukai cingase pikai ki isiyu. ku saseveha wapiyuhu ngukakai ki lringauli, palalrange uma ki lrabingili, ku ngwakakaelrea ka langatu twapapalra ki saseveha mavavelevele myaki waudulridulri, laisaseleba kathahihi kay kidremedremeli.

lu tangeangeaku, ai dulruwaku ikay ki iyali tangeangea ka taikaikaiya, kidaili ki elreva, kidaili ki vangevanga, kahimuhu ku upunga, kahimuhu ku sakuwalri, kahimuhu ku lisia, ngipapatahumaha ku sakiahagai, kadruwa ku natikiyanenga ku sepela, aidulruwaku muelebe ki kidremedremeli si putaluvayvai ku sakiahagaili.

當我一個人時，喜歡對這鏡子說話，說自己的小秘密，說自己的夢想、快樂或煩惱，和鏡中的自己擠眉弄眼，成為好朋友。當我一個人時，喜歡全神貫注地做我喜歡的事，或摺紙、或看書、或畫畫。當我一個人時，會到院子裡散步，聽蟲鳴鳥叫，賞花賞草，微風輕輕親吻我的臉，大樹搖擺樹枝，陪我跳舞。當我一個人時，我可以在自己的小天地，自得其樂，一點兒也不寂寞，可以開開心心的過生活。