朗聲四起

ku igayga, pangukai mita ka swalrawlraudru ka Ngudradrekai, yakai ku tangea ku umase ku sya Viungu, ku takaumawmasaneini saniange tuhamuhu, ani ka lrigila, ani ka hakaca walribate mulrivili ki umase.

ku Dripungu sa kela ki cekeleta lregelrege, wailuku ku matiasamali ku tahukudra, la capange silape ku apakalilisia ki cekele si umase, ku kinauwacekela mwakuludru makanaelre, nilringa ku latalyalalai, ku sawkuludrulini thathibuhanelini, kadruwa ka masipelrepelrenge pakamaesai, kadruwa ka asasiakane pakalimeme ki aga. la ihubu mapelaela si mapalrailraingi sikaulu ku tangea ku umase, ku aidavace madrekadrekase ki Dripungu, ai kadruwa ku natangea ku kyaumau kisikaulu ngwalai ki saukuludru.

idra icengecenge, yakai ku umase ku sya Viungu, ngyakakamani palraingi amani ka kiasikawlu kidrekase ki Dripungu. ai pwataluvayvai ku taingea ku samababalritha si muhikai ku akipalrainga ki talyalalai, amani ku apasikaiya iniya dwahepe ku daane, si sihapale ki wacekecekeleini, lapalraingi ku latalyalalai. kau Viungu twatapacadha ngicacilri ku niyakeini  si davace kidrekase ki Dripungu, satalu ku lrigilaneini gahanganeini, la ngilrepenge ngimiya ku tamadrekadrekasa.

kay Dripungu sa ahakai ku pukulini si adremelini pamakinga ki kacalrisiya, yakai ki cacekele cegecege ku takadrekadrenga ka kungkuwa, ai, aiamani ku kisace ki Dripungu ku mahasiakai kwadrenge ki Ngudradrekai, ene myaiya iniya, ai kai Dripungu kadruwa ka maela ku tamusakena ki Viungu, palraingi ki Viungu pikai ki taikaiyanelini ka daane ngisasingkai ku kadalameini pilri ku apiunguluini ka bava, si mapalrigilrigunga mapelaela ikay ki cekele ku takiusakena ki Viungu.

ku latalyalalai pangiamiya ku takiketeketa palraingi ki Viungu, pasikai iniya dwahepe ku daane, patahumaha bwaai ki Viungu ku ea ka daedae, la pasicivahe ku lrigu, ku lahetesaneini makanaelre kyasupilri ku thimithimi ki talyalalai. ai ku matitaulrana ki Viungu pangiadrau tuhamuhu lu ungulu ku bava, la kyahabava pwacai. amani ku athingalaneta, kay bava niya, wakakelretemadu lu ungula, amani lutulisi ki kinaumasanemadu.

對西魯凱群而言，Viungu是位英雄人物，無論是才智、英勇都有過人的表現。那時日人挑起爭端，族人畏懼，貴族頭目更是終日惶惶，寢食難安。大家提議派一個人前去和日本人交涉，但無人敢去。

有個叫Viungu的男性自告奮勇前往，但要貴族答應替他蓋房子，照顧他的家人，冒著生命危險去與日方交涉，憑他的智慧與勇敢，交涉成功，並能在日人居所來去自如。貴族們守約替Viungu蓋了房子，給Viungu一塊耕地並賞他榮譽，可惜他愛好喝酒，終因飲酒過量傷身而亡。