朗聲四起

lu angyaiyaubu madalamaku iluku ku hungu mudrakehale si ibelenge ki tapulregelrege, kilalalalra ku lingau ki acilai lu behabehai si taku isaseleba ceceele ki hungu, mukalavalava ki vai lu lriugu ki lregelrege hau kadradrimiti haukadradrimiti. myaki pupuli kadihethenge ka senate, ka kiahakai ku icecelrenge ka ingki padidi si musagai aicecelrenge pasaelre, si amaninga ku kiakabungu ki dradrimita ka maungu.

kadruwa ka tahathainu, ku dringki ki cekele mapacungucungulu kudalai ledra, twalai ki lribange, twalai ki saulatadra, ngibuwale ka ledra, myaki mababai mapacucungulu ku batungu ki apui, twalai salraulraudrunga ka daane, kela ki sadradradhanga ka daane, masiasilange kihagai kidresenge ki maungu, kay cekelenai yasasana kipaledra pasaelre. lamiyaikai ki vayvai ki vayvai, ku kiapaledra ki dringki ka maungu wakela mutaluvaivai, lu amyalrealre ladavace, masasulrithi ki vaiya kela kaumasa, kadruwa ku umase ku pualringau ku tangilribalribatanelini si ku paluludanelini. pakela sa ikay ku vayvai, ku Sungciu pangwakai ki husu pelaela naiya ka mapapangale, kay maungu aikadruwa kaedrepe ku dringki, lu kidremedrema kay maungu kayasaa aitaha ikay ku tamakakaelaa--.

sa ibelengeana ki lregelrege kaiyana lriugu ku vai, , sa kaiyana kadradrimiti, ku lavavalake masulriulrithi kidaulu ki mahudraudrange ku asikelrea, kipabalrithi ku mabula ka kahingalai, yakai ku wacekecekele ku wasalri ku cukui si alruunu patwalai daane pauwa kalatadra, sakaiyana kadralrimedreme latukuaubunga. yakai ku wacekecekele ku wahubu ku angatu si twapui pakadraheange, simasasipalra ki dralrimedrema wakame ku butulu, yakai ku wacekecekele ku padalai ku rusuku, kisupilri ku yakai ki dradrimita si aharusuku paledra tukuawbu, pakela sa sapeapecenga ka zikange, ki dadana makitwa mudaane, kay cekelenai laahu kababitingi kababitingi, kadruwanga ku mahahiyau ku natikiyanenga, tuapapalranga ikay dralrimedrema kasamu ku tapeca.

lu kaesaesaita mudringadringaita, sa ikaiyana kay niaketa, tathingale taulra kilibake kisamula, anikai avutha ku taikaiyaneta kawmasa.

傍晚，我喜歡帶著書到河流中的大石頭上，聽著水潺聲，靜靜地看書，等待黃昏時刻到來。天黑了，燈從一家家的窗口、大門一盞盞的，像傳遞聖火般點亮了，天亮了就走，日復一日，沒有人特別注意過它的存在，它的消失。直到有一日，村長廣播告知晚上要停電，這個夜晚肯定會很不一樣……。今晚，家家以各種不同的方式度過這被黑幕籠罩的夜晚。提醒我們尚有生命氣息，要好好珍惜，辛勤努力，不要枉然活著。