朗聲四起

kaladrangedranga, kadruwa ka madalame musuwa!

sana kelasu, saha pacuunu ngibwale ku vai, takalra ku umase ku yakai ilebe ki myaki apui ka vai twatwatuma, kipakuwalri tuhamuhu.

sana kelasu, yakai lu mailukusu ku ngyacaeme ku saseveha si tahwadrau ka udale, la sedrekenga si kadraunga ku acilai, lriyaunga ki cekele si sulisinga ku kinauwacekela, la ngutukadrenga ku kaelrea, kangetelenga ku lataludru si kaidu pikakuwanga masasawlri, ku cekelenai la myaki pakuulruulrulu ikay lregelrege.

kaladrangedranga, amanisu kwadra masulrapele macicacava ku talibelenge, sika wabalai ku ngialisiya ka aidridringa, sana kelasu, sana aumase makitu kyahahagai makanaelre lwangai ku kulri si kane, lwangai ku mangangehece ka acilai si ungulu, amalra ku lamadru ki angatu pasingkai pingsyang si kane, pakalimeme tuhamuhu. kaipulringau sika akabalribalrithi kay tacebea ngwalai ki taungula ki mangangehece, takanea ki malimeme ka lamadru ki angatu.

sana kelasu, maculu kay daedae, wadrangedrange kay adalridalrima, la kadalamenai iyadringi ki daane kiipi ki lengci si kangangehece, lu kelanga ki tababaadha ku drikiana, la ngitulukunganai ki kucingalrana, kipakuwalringa ku sabaadha.

kaladrangedranga, kadruwa ka madalame musuwa, sana kelasu, mailukusu ku alralregele atatimalau atatabange, pacebenga ku matiawkuludru makaelaela ka caema, yakai ku ngwalai si pacai, yakai ku ngwalai si kyangeange, yakai ku ngwalai si ibalriyu ikai tauwana si kaimaka twatuma, kaimaka mugaku kibulru, ki takibubuwa tasietea ku aikibuu.

kaladrangedranga, palraingisu ngitatupela? mwalra sinau inya langyalisia ka caemanesu? lu pangibuwalesu ku vai pakasulrapela, anikai dalace, lu paudalesu kekelreta, sana mudruanga kay daedae isadraa, lu pakasasevehesu palalranga, kai tulisi ki kaelrea, kai paukadrulu ki langatu si ladaane, lu kelasu kaimailuku ku caema, lasu amani kwadra kiakadalame kimuhikai kisidrama ka kaladrangedranga.

夏天的到來，天候不穩定，造成很多天災，影響民生。夏天的到來，會讓人有很多壞習慣，會帶來很多的病媒，影響環境衛生及身體的健康。夏天的到來，讓人不舒服，以致不太受歡迎。希望夏天能改改壞毛病，成一個受歡迎的季節。